Rey Willem Alexander a firma KB di nombracion gobernador Aruba

DEN HAAG - Su Mahestad Rey Willem Alexander a firma e decreto real pa oficialisa e nombracion di Alfonso Boekhoudt como proximo gobernador di Aruba. Multipel fuente for di Hulanda a confirma esaki diamars pa NoticiaCla.com. "E ta confirma y oficial" tabata e palabranan ricibi for di e varios fuentenan na Hulanda. Esey ta nifica cu practicamente nada mas no por wordo haci contra esaki y cu e nombracion ta un 'done deal'. Oficialmente Boekhoudt ta cuminsa eherce su funcion nobo entrante 1 di januari 2017.  

SITUACION ARUBA STATUS QUO

Mientrastanto for di seno di gobierno di Aruba, ainda no tin ningun informacion oficial ni inoficial di e nombracion aki. Manera cu NoticiaCla.com a raporta den fin di siman, gobierno no ta nada contento cu e desaroyo aki, y a cuminsa mas bien un guera personal contra e persona en cuestion. "No spera ningun boletin for di seno di gobierno pa cu e nombracion aki" ta loke e portal aki a compronde di su fuentenan. Gobierno ta para ariba cu e asunto ta uno cu no ta corecto, no a bay corecto y como tal no por keda asina sin mas. Sinembargo, mas investigacion cu NoticiaCla.com a realisa ta mustra cu, mientras cu e forma con Hulanda a atende e asunto, no ta esun mas elegante, e tabata den su pleno derecho y cu den e caso aki, ta gabinete Mike Eman II ta esun cu ta robes pasobra nan no a haci suficiente esfuerso pa agilisa e proceso aki.

E NOMBRACION

Manera ta conoci, Conseho di minister di Reino diabierna mainta a bay di acuerdo riba sugerencia di minister Ronald Plasterk pa nombra Alfonso Boekhoudt como e proximo gobernador di pais Aruba. Boekhoudt ta drenta den su funcion nobo entrante 1 di januari 2017. E ta den funcion pa un periodo di 6 aña. Yvonne Lacle-Dirkz (64) a wordo apunta mes momento como gobernador interino di Aruba. Su funcion ta entrante 1 di november proximo. E ta sigui actual gobernador interno (Ella) Tromp-Yarzagaray.