Aruba Birdlife Conservation ta reta Zoetry Isla di Oro Aruba

ORANJESTAD - E desaroyador di proyecto Zoetry Isla di Oro den un comunicado di prensa dialuna den NoticiaCla.com, a publica cu nan proyecto ta wordo sosteni pa comunidad di Aruba y pa tur NGO.

Den un comunicado di prensa Aruba Birdlife Conservation (ABC) despues, a indica cu nan a logra haya mas di 10.000 firma cu ta mustra lo contrario di locual Zoetry Isla di Oro ta bisa.

Banda di esaki segun ABC, tin prueba di 5 NGO, cu for di april 2016 ta opone nan mes contra e proyecto y a duna esaki di conoce na e desaroyador y na Gobierno di Aruba.

Den e comunicado di prensa di e desaroyador, e ta bisa cu e ta completamente transparente cu tur hende y cu e proyecto lo no causa daño na e mangelnan (mangrove).

Al contrario, e desaroyador ta bisa cu e proyecto lo salba y proteha e mangelnan na Savaneta.

Na februari di 2013 Parlamento di Aruba na un manera unanime a vota pa proteha e mangelnan y pa nan wordo declara como parti di Parke Nacional Arikok.

Segun ABC, e proyecto di Isla di Oro no ta cuadra cu e deseonan di e instituto mas halto di Aruba su democracia.

P'esey Aruba Birdlife Conservation ta reta e desaroyador Zoetry Isla di Oro Aruba pa publica nan diseño final di e proyecto, pa asina di berdad tin transparencia pa pueblo di Aruba.

Na e manera aki e desaroyadornan por haya un oportunidad real pa comproba cu nan lo no mishi cu e mangelnan.

ABC ta reta e desaroyadornan tambe pa publica e rapport completo di e estudio riba e impacto riba medio ambiente (Environmental Impact Assessment Study), pa loke ta nan proyecto.