Aruba aserca pa yuda Bonaire cu ABC Hub

KRALENDIJK/ORANJESTAD – E plan pa converti e isla di Bonaire den un hub pa Caribe y Latino America, lo mester conta cu ayudo tambe di Aruba y Corsou. E ta necesario pa e plan completo pa crea e asina yama ‘ABC hub’. Mientras cu ta haci mencion di Aruba y Corsou, no ta specifica si ainda ki ayudo ta pidiendo di e islanan aki pa logra e ABC hub . E idea por lo menos a bin di e ‘stuur groep’ cu a lanta for di gobierno di Bonaire y Bonaire International Airport (BIA) pa crea e ABC hub. “Ta trata di algun stakeholders den aerolinea” un bon fuente for di Bonaire a confirma na NoticiaCla.com.

Mirando cu e idea pa e hub a sali netamente for di tanto gobierno como BIA, a pone cu ora cu henter e hunta di comisario di BIA a retira ‘en bloc’ recientemente (pa motibo di un desacuerdo cu gobierno di Bonaire), el a crea precupacion serio entre esnan concerni pa e plan di expansion di e aeropuerto y e hub no fracasa. E motibo di retiro mes tabata, pasobra BIA no tabata di acuerdo cu e forma con gobierno (di Bonaire) tabata conduci cierto aspecto di maneho. Gobierno di su banda a mustra cu nan a actua conforme ley y statuut di aeropuerto, y cu nan tin e ultimo palabra di tur forma siendo e accionista principal. Mientrastanto NoticiaCla.com a haya confirmacion cu ya a/y ta solucionando e ‘discrepancia’ aki unda cu ta nombrando un hunta nobo, cu por conta te hasta cu un miembro di e hunta anterior. Cu esaki, e plan di hub ta keda rescata y por continua cune awor.

Tabata siman pasa cu prensa hulandes a publica e noticia di e hub, cu ta papia cu e aeropuerto di Bonaire lo wordo expande ‘drasticamente’. “Hunto cu Aruba y Corsou, Bonaire mester bira un hub importante pa e region di Caribe y Latino America” e noticia tabata bisa. Esaki ta cuadra cu e informacion cu NoticiaCla.com a ricibi di su fuentenan. Un reunion cu a tuma lugar recientemente riba e tema tabata uno na nivel halto na Bonaire entre e.o. KLM, Arkefly y Insel Air cu lo mantene e relacion entre islanan cu avionnan di ex KLM, esta Fokker 70. Otro participantenan tabata representantenan di e seccion di control di trafico aereo hulandes, (LVNL) ministerio di relacionnan interior di Hulanda (na nomber di minister Ronald Plasterk), y gobierno di Bonaire.

Loke e fuente for di Bonaire a confirma na NoticiaCla.com ta, cu mientras cu Bonaire su intencion ta pa busca acercamento for di Aruba y Corsou pa e ABC hub, Bonaire mes kier establece su hub cu ta beneficia e isla cu un coneccion directo for di Bonaire cu Manaus, Brazil. Ta e intencion cu lo por almacena hopi carga (flor y berdura) procedente di Sur America.

Investigacion cu NoticiaCla a haci, ta mustra cu e persona cu ta lidera e concepto di e proyecto aki como ‘lobbyist principal, ta e propio ex CEO di KLM, Peter Hartman. E ta forma parti di e stuurgroup menciona den capacidad di su funcion di vice presidente di KLM/Air France. Segun Hartman su declaracion, ta miho pa ‘inverti den un proyecto semehante pa asina duna e pueblo di Bonaire un perspectiva y asina resolve cierto problema cu e isla tin’.

E proyecto ta uno hopi ambicioso y ta den e fase hopi curu ainda. “Enberdad ta awo ta bay duna e plan contenido y busca financiamento” e fuente a sigui bisa NoticiaCla.com. E informacion cu NoticiaCla.com tin, ta cu ya caba a acerca Aruba su gobierno pa un input, mientras cu Corsou ainda falta pa sera contacto cune. E persona cu ken a lo a tuma contacto cune, ta prome minister di Aruba, aunke cu NoticiaCla.com no por a confirma esaki ainda cu e prome mandatario di Aruba.

Informacion di otro fuente for di Hulanda sinembargo a informa NoticiaCla.com ta cu un problema cu e ‘stuurgroep’ lo ta confrontando of a confronta ta cu KLM cu lo mester a bira un ‘partner’ hopi strategico, lo a of ta bulando afo y awor e grupo, lidera pa Hartman, lo ta acercando otro gruponan y gobierno Hulandes mes cu e intencion di busca fondo pa por financia e proyecto ambicioso aki.