'Start up' di e refineria lo dura entre 18 pa 24 luna

ORANJESTAD - Refineria di Aruba ta bay bira un compania masha activo pasobra pa prome biaha Aruba ta doño di e refineria, asina Alvin Koolman, Director di Refineria di Aruba (RdA) a expresa durante e ceremonia di apertura diabierna ultimo. No solamente ta bay vigila e operacion y percura pa cumpli cu tur e contractnan sino cu e ta bay bira un parti integral di e sociedad y economia di Aruba.

Alvin Koolman a agrega cu ora cu a cuminsa e negociacionnan aña pasa, Gobierno a bisa pa no haci solamente e parti di refina. Ban pensa riba e parti "clean" y p’esey gas a bin aden y e parti "green" cu ta e parti di e “algen” cu ta bay haci e "bio-refinery". E tres areanan aki so ta un oportunidad hopi grandi.

E director di RdA a subraya cu e negociacionnan cu CITGO a cuminsa na december 2014 y e mes a join e team na juni 2015. A dura hopi pa negocia tur e detayenan, pero desde inicio di e operacionnan dia 1 di october ultimo, ta premira cu ta bay dura entre 18 pa 24 luna pa e prome fase di "start up". Asina cu esey ta tras di lomba, lo dura un otro 12 luna pa e ora ey e refineria lo ta full den operacion.

E siguiente paso awo ta inspecciona e planta pa yega na un plan con ta bay renoba e refineria. Esey CITGO ta haci conhuntamente cu Gobierno. Lo haya e partinan mecanico, entre otro y un aspecto importante ta cu CITGO lo scoge su contratistanan principal cu ta bay haci henter e renobacion. Despues di esey e empleadonan lo cuminsa drenta, e director di RdA a indica.

Ta un proceso cu ta bay dura su caminda, pero despues lo duna e comunidad mas detaye. El a enfatisa cu e meta ta pa tin mas Arubiano posibel trahando den e refineria. Den e proceso di tur industria ta cuminsa train e hendenan local y poco poco den e revitalisacion lo importa hende pa yuda den e proceso. 

"No pensa cu esaki ta pa semper. Ban tur nos localnan opera e luga aki den un forma safe pa e doñonan keda haya confiansa pa por sigui inverti den Aruba. Di tres biaha a pasa cu nos a cera un refineria, un porta principal pa e economia di Aruba. Kiermen nos tin cu percura pa yuda y aporta pa mantene esaki bibo", Alvin Koolman a enfatisa.

Despues di lunanan di preparacion y anticipacion, entrante dia 1 di october 2016, Gobierno di Aruba a crea un compania nobo, cu a haya e nomber di Refineria di Aruba N.V. E compania ta pertenece 100% na Gobierno di Aruba y a bira doño di e refineria, e terenonan y tur e facilidadnan traha ey riba. Refineria di Aruba ta “lease” e facilidadnan awor cu Citgo Aruba, cu lo opera e refineria a base di contract firma.

Esaki ta un era nobo, pasobra ta te despues di 92 aña cu nos ta bira doño di e refineria. Na cabes Gobierno a nombra Alvin Koolman, un persona cu hopi experencia den e industria petrolero y cu tabata envolvi for di tempo di Lago y como tal conoce e facilidad, pero tambe conoce e industria internacional di petroleo.