Tropical Bottling a celebra 120 aña di servicio di empleadonan

ORANJESTAD - Tropical Bottling Company a tene un fiesta special pa celebra e hecho cu algun empleado special a dedica practicamente henter nan bida na progreso y crecemento di e compania. Eddie de Veer, CEO di Metacorp, a laga sa cu esaki tabata un celebracion di 120 aña di servicio di 4 empleado. Tres empleado a cumpli 25 aña di servicio y un empleado a cumpli 45 aña di servicio locual sigur tabata un ocasion pa celebra.

E hubilarionan pa cual a celebra e logro di 120 aña di trabou ta Bianca Wester (25 aña) di e departamento di Accounting, Fabian Gutierrez (25 aña) kende ta un Supervisor, Reynalso Somaza (25 aña) kende ta un representante di benta y Bienvenido “Bienve” Alberto (45 aña) cu ta traha den e departamento tecnico di e compania. E hubilarionan a ricibi palabranan di gradicimento y felicitacion di parti di Richard de Veer, gerente di benta y Mercadeo, Paul Disch, Gerente General y Eddie de Veer, den su funcion di C.E.O di MetaCorp.

Segun Eddie de Veer, cada empleado tin un storia pa conta. E parti mas importante ta cu nan ta empleadonan cu a enfoca riba nan trabou, nan a habri nan mente y nan curpa pa acepta e cambionan cu bida ta trece pa tur. Nan a cuminsa den un era cu tabata haci administracion riba papel mientras cu awendia tur cos ta via computer. E mashin di yena refresco ta yena e refresco pero e caha tabata wordo baha na man. Awendia bo no ta mishi cu e producto mes, de Veer a indica.

E empleadonan aki a mira cambio den tecnologia pasa nan dilanti y a logra di haci esey den un compania so, locual ta algo di aplaudi y cu no tur ora ta logra esey. "E ta yena mi cu hopi satisfaccion y orguyo cu mi por ta awe nochi akinan pa celebra 120 aña entre 4 empleado. E ta un logro hopi grandi. Mi ta spera ami yega e 45 añanan aki", asina e CEO di Metacorp a expresa.

Bienvendo  “Bienve” Alberto, Supervisor di e departamento di “Postmix” a cumpli 45 aña trahando cu Tropical Bottling Company y Brouwerij Nacional Balashi. Ela cuminsa cu pikimento di boter, despues a bay traha na e mashin, di mashin a bay na truck pa despues tira sucu den e produccion. Cu tempo su trabou a cambia y a pasa pa drechamento di mashin. Ora Postmix a drenta, el a cuminsa traha eynan y e compania a cuminsa crece. Bienvenido Alberto a agrega cu nan ta masha contento cu e fiesta na nan honor. E no tin nada di keha, pasobra cada 5 aña e ta wordo reconoci. 

“Bienve” cu a cumpli 45 aña a mira diferente director na Tropical Bottling Company, manera Johan Raadsma, Eddy Porry, Oscar Bikker, Eddie de Veer, Wendell Bennet y actualmente Paul Disch.