E bapor 'De Holland' a sali di Aruba rumbo pa Haiti

SAVANETA - Prome cu e bapor 'de Holland' a sali pa Haiti cu shen miembro di Marina Real y dos boluntario di Cruz Cora, Prome Minister Eman hunto cu Comandante Timon van Dishoeck, tabata presente na e pier di Kustwacht pa desea nan exito cu nan mision y duna nan palabra di apoyo pa loke nan ta bay mira y mester traha cu ne na Haiti. Despues cu horcan Matthew a hit Haiti den forma directo y cu forsa bruto, e pais y su hendenan a keda den un situacion devastador, un situacion di tormenta. Marina Real Hulandes situa na Aruba ta bay brinda ayudo eynan y for di Corsou tambe ta sali e bapor 'de Pelikaan' rumbo pa Haiti cu comestibel, awa y loke mester pa brinda cuido medico y ayudo humanitario. 

E bapor 'de Holland' ta full ekipa pa e mision aki y hunto cu nan ta bay dos miembro di Cruz Cora cu boluntariamente ta bay yuda. Nos ta masha orguyoso di nan. Nan ta Marla Thiel-Dominguez y Andre Petrocchi. Marla a bay Haiti 4 biaha caba durante momentonan sumamente dificil pa Haiti. Dos bes tempo di e teremoto y dos bes riba misionnan internacional. E experiencia di Marla por yuda e otronan den asistencia cu por tin un contribucion importante den un situacion sumamente penoso cu tin na Haiti na e momentonan aki."

Haiti ta un pais caba cu hopi reto cu situacionnan dificil, awor ta haya un situacion adicional cu naturalmente ta haci cu nos como mundo tin cu responde pa yuda. Despues di e temblor Aruba a traha dos scol eynan y semper a keda purba pa duna un contribucion humano na e pais aki. Eman a desea Marla y Andre hopi exito, sabiduria y siguridad riba nan mision mescos tambe esnan di Marina Real.