Nombramento unilateral gobernador Aruba tin gobierno local rabia

ORANJESTAD - Nombramento unilateral di un gobernador nobo pa Aruba pa parti di Hulanda diabierna, a crea un problema serio entre Aruba y Hulanda atrobe. Motibo ta cu e nombracion diabierna a cay como un sorpresa total pa gobierno di Aruba, particularmente prome minister di Aruba Mike Eman. NoticiaCla.com a compronde di su fuentenan cu esaki tabata e motibo principal pa cual Eman no a presenta diabierna mainta na e ceremonia di CITGO na San Nicolas. "E mandatario ta mucho desapunta, sorprendi, rabia" tabata e reaccion. 

COMBERSACION CU HULANDA

NoticiaCla.com a compronde cu apenas un dia prome, esta diahuebs, tabatin combersacionan ainda entre e prome mandatarionan di Aruba y Hulanda esta Mike Eman y Mark Rutte, y tambe cu e persona en cuestion. Y e señal tabata cu e persona cu a haya e nombracion, lo no tabata of bira e candidato. Ademas, cu e lo a protesta oficialmente contra e forma di proceder di e nombracion. Sorpresa tabata grandi como tal, ora cu diabierna Hulanda a manda avisa den un comunicado, cu Alfonso Boekhoudt mes ta bira e proximo gobernador di Aruba. 

GOBIERNO RABIA

NoticiaCla.com via su fuentenan cerca di e proceso, a confirma cu practicamente gabinete Eman II completo (cu excepcion di algun) ta hopi disgusta no solamente cu Hulanda, sino cu Boekhoudt tambe pa a acepta e nombracion contra tur palabracion. Mayoria minister di e gabinete ta disgusta riba nan colega, y a mustra cu nan lo no laga esaki pasa sin mas. E portal aki tin informacion fidedigno cu gobierno lo 'purba' bringa e asunto aki cu tur forsa cu nan por tin, y no ta descarta cu esaki lo por bira te hasta un guera personal. Sigur despues cu Hulanda a desvia completamente di e lista di 3 nomber cu Aruba a presenta algun tempo pasa. E nombernan Angel Bermudez, Ike Posner y Glenda Margaretha no a bin dilanti mes. Informacion cu e portal aki tin, ta cu despues cu a informa Aruba repetidamente cu e candidatonan aki no ta esnan corecto, Aruba no a haci otro intento serio pa presenta otro candidato. Y e tardansa a pone cu Hulanda a dicidi di tuma e desicion unilateral diabierna ultimo. 

POSIBILIDAD PA REVOCA E DESICION

Investigacion cu NoticiaCla.com a haci, ta mustra cu mucho no por wordo haci aworaki mas, pasobra si tabatin cualkier chens pa 'para' e asunto aki of 'protesta', esaki mester a sosode durante e reunion unda cu a discuti e candidato den RMR siman pasa, e asina yama 'voortgezet overleg van de Rijks Minister Raad', segun articulo 12 di Statuut. For di informacion cu NoticiaCla.com tin, esaki no a sosode, y como tal no por haci mucho mas contra e nombracion aki.