CITGO Aruba inaugura oficialmente durante ceremonia dilanti refineria

SAN NICOLAS - Durante un ceremonia oficial dilanti e porta principal di e refineria e apertura oficial di CITGO Petroleum Corporation  a tuma luga. Esaki a  sosode den presencia di ehecutivonan halto di CITGO, entre nan CEO Nelson Martinez, ehecutivonan di PDVSA, entre nan VP di refinacion Jesus Luongo, Minister di Energia Mike de Meza, demas ministernan di Gabinete Mike Eman, miembronan di Parlamento, director general di Refineria di Aruba NV Alvin Koolman, miembronan di e team negociado y otro invitadonan. Por a mira tambe un cantidad di hende cu a yega cerca pa presencia e momento historico di reapertura di e refineria. Un momento historico pasobra pa prome bes cu, durante su existencia, e refineria ta propiedad di pueblo di Aruba. 

A cuminsa cu e ceremonia di hisamento di bandera. Banda di e banderanan di Merca, Aruba y Venezuela, e hobennan di padvinderij bou di 'teomgeroffel' a hisa e banderanan di CITGO y Refineria di Aruba NV; Un bunita momento. Despues a sigui 5 discurso, cada uno accentuando e importancia di reapertura di e refineria. 

Den su discurso Alvin Koolman, director general di RDA a bisa "Awe ta un dia importante. Mi ta entusiasma di ta para aki." El a sigui conta con hopi mas di un aña pasa su bon amigo Mike de Meza a yam’e mientras e tabata na Surnam pa puntr’e si e por ta parti di un team pa mira e posibilidadnan di un reapertura di e refineria. El a splica cu ora nan a discuti riba e modelo di un ‘upgrader’, el a realisa cu esaki tabata e comienso di algo grandi. "Bou guia di Minister de Meza nos a hinca un team den otro cu nos a considera un 'dream team'. Resultado di e trabou di e team aki, nos ta mira awe." 

Minister de Meza, e motor cayente tras di reapurtura di e refineria a gradici su team y tur otro envolvi. Ela conta un poco e historia di e refineria y e relacion cu semper  tabatin cu Venezuela. "Semper tabata un placer tambe pa negosha cu e team di CITGO bou guia di Nelson Martinez." De Meza un biaha mas a gradici su man drechi, su ayudo solido, e persona cu semper tabata banda di dje den e periodo dificil di negociacionnan, Richard Arends. 

CEO y Presidente di CITGO Nelson Martinez a cuminsa su discurso cu algun palabra na Papiamento, un gesto cu a wordo hopi bon ricibi. Siguiendo su discurso Martinez a bisa cu awe CITGO ta masha orguyoso di anuncia e apertura oficial di e refineria. Un reapertura cu ta resultado di trabou duro entre partidonan envolvi. "Guia pa principionan di solidaridad y complementario pa crea un entidad comercial dinamico cu ta promove balornan socio- economico pa tur partido envolvi."

Sr. Luongo di PDVSA a gradici tur cu a traha duro riba apertura di e refineria. Despues el a tira un discurso cla unda el a mustra riba e diferente posibilidadnan y avenidanan cu ta habri hunto cu e refineria. "E refineria aparte di brinda hopi trabou, tambe tin un impacto economico grandi. E gas cu ta bay wordo uza ta sin duda otro beneficio directo pa pueblo di Aruba. Esaki ta bay hisa e calidad di bida." 

Minister di Labor Paul Croes, kende for di un principio tabata hopi envolvi den e negociacionnan, a papia na Spaño, loke tambe a cay den hopi bon tera, ilustrando cu e hendenan di Aruba ta domina varios idioma. "Nos gran amigo Mike de Meza a acepta e reto pa inicia un proceso dificil cu a termina exitoso y a conduci cu awe nos tur ta sinta aki cu un sonrisa riba nos cara pa mira aki rato con literalmente e porta principal di e refineria ta bay habri un bes mas pa tur e empleadonan por drenta y traha eyden, manera a wordo bisa for di cuminsamento."

Despues di e discursonan a sigui develo di e borchi cu e nomber di CITGO. Otro momento special y na final a planta, e simbolo special di Aruba, un mata di Divi Divi na entrada di e porta principal di CITGO.