Aruba su aeropuerto ta certifica pa ICAO

ORANJESTAD - Minister encarga cu transporte Otmar Oduber a haci entrega di Aerodome Certificate na Aeropuerto Internacional di Aruba y su maneho, esaki ta e certificado di operacion di aeropuerto. E certificado aki ta bisa cu AAA ta den cumplimento cu e standardnan estableci pa Aruba y ICAO, cu ta e organisacion internacional pa aviacion civil.

DEADLINE PA CUMPLI 

Algun aña pasa na Port of Spain, un tratado a wordo firma cu cierto paisnan den Caribe caminda promesa a wordo haci cu pa 1 di december 2016, Aruba mester ta den cumplimento cu certificacion di aeropuerto. Den cuadro di esaki diferente ehercicio a wordo haci, manera aña pasa aeropuerto a haci un audit di su mes pa mira si ta cumpli cu e standardnan internacional. A yega na e conclusion cu nos aeropuerto ta cumpli cu standardnan internacional, Glenn Kelly di Departamento di Aviacion Civil (DCA) a informa. Sr. Kelly a enfatisa cu no ta asina cu aeropuerto tabata insigur, es mas tabata cumpli pa basta tempo ya caba cu e normanan. E audit aki a yuda pa drecha discrepancianan aki aya, cual diligentemente AAA a logra coregi. “Mi kier a bisa cu DCA di Aruba ta hopi contento cu e standard cu AAA a presenta ya pa varios aña. Anto esey ta un programa cu, cu tempo bo ta desaroya y crece den dje. Bisando esaki mi kier a yama AAA pabien y por wak e tambe den implementacion di ‘Aerodome Safety Week’ cu ta tuma luga tur aña, cu ta parti di dje. Pabien cu e logro, meta y milestone cu a wordo logra”.

MINISTER OTMAR ODUBER

Mi ta orguyoso y cu hopi honor mi por bisa cu awe nos ta cumpli cu tratado cu nos mes a firma den pasado (no ta cu nos aeropuerto no tabata safe). Pa loke ta e tratado cu a firma a acorda cu por lo menos 48% di aeropuertonan den Caribe lo mester ta certifica conforme reglanan di ICAO. Departamento di Aviacion Civil ta forma un parti integral di e cooperacion cu mester existi den e ‘keten’ cu tin pa loke ta trata aviacion na Aruba. No por keda sin menciona IBSL cu ta forma parti y ta percura tambe pa e plannan di siguridad cu ta wordo poni riba mesa wordo aproba y e ehecucion di esaki por wordo controla. Pero ta e Departamento di Aviacion Civil ta esun cu finalmente ta responsabel pa controla y certifica aeropuerto su operacionnan.

CEO AAA JAMES FAZZIO

Mi no por enfatisa suficiente con importante e pida papela aki ta. Pasobra a pesar cu e ta un simpel pida papel e ta representa un fuente di bida pa nos aeropuerto y mester sigur representa tambe un fuente di bida pa Aruba. E certificado ta un muestra cu Aruba su aeropuerto ta na nivel di e miho aeropuertonan rond mundo y cu pa cada pasahero un siguransa cu e ta wordo atendi cu e mayor nivel di siguridad. Tin hopi hende di AAA, DCA y gobierno tambe cu a traha duro riba esaki. ‘Bo por ta siguridad cu e aeropuerto aki ta den bon man y lo keda mantene e siguridad na halto y un di e miho gateway na mundo”.