Hopi Arubiano di vacacion na Florida, preparando pa Matthew

MIAMI - Tin un grupo grandi di Arubiano cu a y ta preparando pa yegada di horcan poderoso Matthew. E motibo obvio cu tin un grupo grandi di Arubiano eynan aworaki, ta pasobra ta temporada di vacacion. Y Florida siendo un spot popular di vacacion, e biaha aki esey no tabata un excepcion. NoticiaCla.com a compronde di varios Arubiano cu nan, mescos cu Mericanonan, tambe mester tuma medidanan di precaucion y entre otro a bay supermercado pa prepara nan mes pa un posibel pasada di horcan Matthew. Nan mester a cumpra tambe material pa cualkier eventualidad si nan keda pega eynan. Un grupo grandi di nan ta na Orlando, unda cu ta spera biento di horcan posiblemente. Tin caso di famianan henter, y te hasta varios famia hunto, grupo di amigonan di trabou cu a uni y bay hunto, tur awe ta preparando pa yegada di e horcan teribel aki.