Cafe The Plaza a celebra 25 aña di existencia

ORANJESTAD - Den presencia di invitadonan, Cafe The Plaza, orguyosamente situa den Renaissance Marketplace, a celebra nan 25 aña di existencia. Ta trata aki di un di e huurdonan di mas aña den e mall y un di esunnan cu a base regular tin eventonan, ta percura pa entretenimento y specialmente hopi ambiente.

E storia di Cafe The Plaza a inicia hasta prome cu e mall a pertenece na Renaissance Marketplace, for di tempo di Harbour Town. Di e tempo ey, e mesun concepto di e restaurant Hulandes, esta balor pa locual bo ta paga p'e, tremendo menu cu opcionnan di cuminda den un atmosfera relahante y yamativo, a haci'e popular y te awe ainda ta percura pa yena e luga tur dia. 

Den e 25 añanan di Cafe The Plaza a organisa evento di "paalzitten" na 19 ocasion, comemento di haring y torneo di tennis. Durante e ultimo añanan, e restaurant a crece enormemente den popularidad dor di eventonan innovativo y yamativo cu ta organisa semanalmente, sin lubida eventonan di futbol rond di campeonato mundial of campeonato Europeo, ora ta comberti henter e area den color oraño.

Directiva di Renaissance Resort, Casino & Mall, Brouwerij Nacional Balashi, Tropical Bottling Company y MetaCorp a uni pa hunto felicita nan "vendor" den e mall asina popular bou di nos localnan y turistanan. Pabien Cafe the Plaza!