Pullmantur familiarisando cu nos isla pa temporada verano 2017

ORANJESTAD- Diaranson ultimo, abordo di e crusero Monarch, a yega Aruba casi 250 top operadornan, agentenan di biahe y miembronan di prensa di Latino America pa asina por familiarisa cu Aruba.  Durante reciente lunanan Aruba Tourism Authority (A.T.A.), Ministerio di Turismo di Aruba y Aruba Ports Authority a dialoga cu operadornan di Crusero Pullmantur tocante posibilidadnan di negoshi pa 2017/2018. 

COMBERSACION EXITOSO

Combersacionnan aki exitosamente a resulta den negociacionnan fructifero no solamente pa Aruba, sino tambe pa turismo crusero di Caribe. E dialogonan exitoso aki a duna resultadonan positivo. Despues di a dicidi di a cancela destinacionnan den area di Caribe previamente durante luna di juni recien, Pullmantur a anuncia cu nan ta bolbe Caribe den verano di 2017  y na unda e top ehecutivonan di Pullman Tours recientemente bishita Aruba y reuni cu Aruba Tourism Authority.  

REANUDA OPERACION

Den verano di 2017 Pullmantur lo reanuda operacion crusero den Caribe, cu un aumento di ‘Port Calls’ significante, cu hasta posibilidad di aumenta estadianan riba tera firme. Pa A.T.A. esaki ta un exito rotundo pa isla di Aruba cu lo conoce 25 ‘calls’ di e barco Zenith (un ekivalente di 35,280 pasahero). Esaki ta significa cu di e 250 ‘calls’ proyecta pa 2017, awo lo aumenta cu 275 ‘calls’ danki na Pullmantur su barco Zenith. 

E BISHITA

Durante nan bishita na Aruba sr. Richard J Vogel CEO nobo di Pullmantur y Vice Presidente Comercial di Pullmantur Jose Blanco a ricibi, entre otro, un tour di nos isla pa asina por familiarisa cu Aruba su oferta turisitico. Ehecutivonan di Pullmantur a keda impresiona cu e embeyesimento di nos haf y centro di Oranjestad. E dominio di e idioma Spaño y e amabilidad di nos hendenan, ta haci cu Aruba ta destaca y ta atractivo pa e mercado ibero-europeo y latino americano, mercadonan clave pa Pullmantur. Combinando esaki cu e strategia diversifica di A.T.A. pa Latino Amercia, esaki aumenta e potencial y confiansa di dicho operador pa sigui enfoca riba Aruba como destinacion cardinal den Caribe.