Lama bruto despues di horcan causa pa “swell”

ORANJESTAD - Lama bruto despues di horcan causa pa “swell”. Asina director di Meteo Marck Oduber ta declara. Planning a bay hopi bon relaciona cu e pasada di Matthew segun Oduber. September tabatin un total di 54.8 mm di awa, esey ta haci cu september ta un poco mas muha cu norma. October falta hopi ainda pa caba pero ta spera cu ta yega un cantidad normal of poco mas cu esey di yobida.

Horcan Matthew a sigui bay ariba, sin embargo a tuma nota cu hendenan den comunidad a keda vigila e situacion di tempo y diferente desaroyo di tempo den region y lama bruto na Aruba, Director di meteo a comenta riba esaki.

Lama bruto

“Manera nos a keda informa durante pasada di Matthew y despues, cu lama lo bira bruto, awacero lo cay y biento lo boltia. Mientras cu tur cos ta normalisando poco poco bek, loke a keda atras ta lama bruto relaciona cu “swells” cu a keda influencia nos. E suerte ta, cu tabata proyecta cu e swells lo tabata bay influencia nos durante di pasada di e ciclon tropical panoord di nos anto esey no tabata e caso. Esaki a cay un tiki atras y a influencia nos e dialuna, diamars mas tanto y ayera diaranson el a cuminsa ta baha atrobe. P’esey a keda mantene e aviso di cautela pa lama aunke cu e sistema a pasa nos. Pasobra nos tabata sa cu e swells lo influencia costa di Aruba. Por mira cu el a causa basta daño na e costa, a saca hopi zeewier, cocolishi, strea di lama entre otro. E swells ta mustra di a causa mas daño compara cu ora cu e ciclon tabata bande nos y esey ta posibel tambe, Sr. Oduber a splica. 

Pa loke ta e ciclon tropical panoord di Caribe, por mira cu Matthew ta afectando parti di Cuba bayendo pa Bahamas. Pa Aruba Matthew ta historia y lo kita alerta pa botonan den lama y pendiente pa diahuebs merdia kita e aviso di cautela. Nicole ta keda panoord den Atlantico ta draai y no ta molestia nos. E ola tropical cu tin parti Oost di Caribe cu tin hopi hende pendiente di dje, segun pronostico ta bisa e condicionnan no ta lage desaroya y por djis trece awacero cu ne. Cual ta necesario pa Aruba cu ta seco y cu mester mucho mas awacero pa sali for di e secura, Sr. Oduber a informa

David Barkmeyer di meteo cu hopi experiencia den e ramo aki na Corsou, ta agrega bisando cu ta bon pa pueblo tene na cuenta cu informacion oficial di tempo aki na Aruba ta sali for di Servicio Meteorologico di Aruba. Esaki tin di haber cu nos posicionamento cual por ta similar na otro islanan cerca di nos pero no ta identico. “E situacion na Corsou y na Aruba ta hopi diferente den diferente aspecto. Si coy e pronostico di Corsou ora cu ta seco, lo no mira masha diferencia. Sin embargo tin momentonan cu cierto efectonan den atmosfera ta aplicabel eynan y no na Aruba y vice versa, esaki ta conta pa lama tambe”.

Finalmente e expertonan di meteo a bisa cu ta bon pa cada hende tene na cuenta cu lama ta bruto y pues no ta recomenda ningun hende bay den e lama pa landa. E problema ta cu lama ta asina un masa cu ta tarda pa bira bruto y ta tarda tambe pa e calma atrobe, kiermen mester tene pasenshi cu esaki.