Illegalidad ta preocupa Comision ProSiguridad

ORANJESTAD - Ilegalidad ta un topico cu ta preocupa Comision ProSiguridad ya cu mayoria di biaha ta trece criminalidad cun'e.  Mester frena e fenomeno aki y bira mas severo den e castigo pa esnan cu no ta cumpli cu nos leynan di inmigracion.

Tin dos aspecto importante den esaki, tin hende cu ta drenta Aruba di manera ilegal, como tambe tin hende cu ta drenta legalmente pero ta keda sin cumpli cu e rekisitonan.  Den tur dos caso, nos Ministerio di Husticia ta fayando.  

Polis maritimo, Warda Nos Costa y Polis en general mester aumenta nan presencia den e areanan vulnerabel di nos costanan, como tambe razia permanente mester wordo organiza.  Esaki ta algo cu Ministerio di Husticia tin cu incentiva y duna cada departamento e hermentnan necesario pa defende nos pueblo manera mester ta. Mester incentiva e control cu tin riba e aspecto aki pa yega na un Aruba cu menos ilegal.

Gobierno mester crea e condicionan adecua pa e instancianan concerni por funciona manera mester ta.   Mayoria di biaha ta hopi peligroso pa nos agentenan policial atende cu ilegalnan pasobra den hopi caso tin droga y armanan di candela den wega.

E pregunta ta keda ki a pasa cu e instancia cu mester a wordo crea pa maneha tur asunto di migracion na Aruba?  E mester tabata tin dos componente, esta “Grenscontrole” conoci como Servicio di Inmigracion na Aeropuerto y na wafnan y “Vreemdelingentoezicht” conoci awendia como Warda nos Costa. Parce cu Ministerio di Husticia no tin e instancia aki den accion y si t'asina e no ta funcionando manera mester ta.

Ilegalidad ta trece cun'e delincuencia, problemanan social y economico.  Nos tur na Aruba tin e percepcion cu ta hopi facil na nos isla pa un ilegal keda biba y logra hopi cos.

Mirando cu siguridad ta prioridad di Comision ProSiguridad, nos kier haci un yamado na gobierno pa bin cu un plan pa controla ilegalidad ya cu den criminalidad, ilegalidad tin tur cos di haci.

Comision ProSiguridad ta exigi pa stop ilegalidad awo pasobra e no ta contribui na nos SIGURIDAD.

Ban marcha dia 13 di October...pasobra nos kier biba trankil den nos cas!