Corsou por spera sorpresa den eleccion parlamentario 2016

WILLEMSTAD - Tur cos ta mustra cu e resultado di eleccion parlamentario di Corsou diaranson anochi, ta tur cos menos cla. Mientras cu tur atencion a bay pa e partido blanco MFK (di Gerrit Schotte), tin indicacion cu por tin sorpresa den e resultado. Depende cu cua lider politico papia, e sorpresa aki ta varia. Pa algun, nan ta papia sorpresa den cantidad di voto cu nan lo haya (partidonan existente), cu e lo ta mas. Otronan ta mustra cu e sorpresa ta cu no solamente nan lo ta mas, sino cu nan lo ta e partido cu mas a crece. Y den e ultimo aki, e dos nombernan di partido cu ta sigui bin dilanti, ta MAN y PAR. Ambos partido ta premira pa ta e sorpresa di anochi, unda cu te hasta un encuesta haci pa un grupo Hulandes, ta pone PAR como e partido ganador, sigui pa MAN y despues numa MFK. 

COALISION OF NO

Pa MFK un biaha mas diaranson, e declaracion di su lider tabata hopi cla. No ta fomenta coalicion. Y no ta papia di esaki sino te despues di eleccion. Y nan ta para ariba cu nan tin suficiente confiansa den comunidad cu nan lo por haya e mayoria pa goberna nan so. Den un reaccion pa NoticiaCla.com, lider di partido PAIS Alex Rosaria a mustra cu e no ta kere cu Corsou lo haya un gobierno di un solo partido y cu e pais no ta cla pa esaki. Den combersacion cu e portal aki, lider di PAR Zita Jesus Leito a confirma cu nan a crece den ultimo tempo, debi na e forma cu nan a profila nan mes cu 4 punto specifico, y cu esey a duna resultado. Enberdad e ta mustra un partido mas grandi y esey ta nan intencion, segun e lider. E partido cu tabata un tempo na mando, Pueblo Soberano, ta sigui bisa cu nan ta e solucion y cu e resultado lo mustra esey. Algo cu mayoria lider di partido a bisa tambe, esta cu nan ta e solucion. 

SOSTEN PA LIDER

Sinembargo, e sosten demonstra durante e votamento di e.o. e lidernan di partido na nan respectivo urnanan, tabata bastante pober. Berdad tabatin hende, algun partido mas cu otro, y hopi colorido, musical y creativo, pero nan tabata relativamente chikito. Sigur pa partidonan cu den pasado tabata tipifica pa masanan di hende, dunando un indicacion cla cu e partido tabatin sosten. Mientras cu cada grupo tabatin su sosten, e no tabata impresionante manera antes. "Si nan ta asina grandi cu nan ta bisa nan ta, con bin nan sosten awe ta asina chikito pa nan lider?" un votador a bisa NoticiaCla.com. Esey tin un motibo, segun lider di partido PAIS a splica NoticiaCla.com. "E eleccion aki tin hopi menos  hende cu ta bin cu tshirt di nan partido. Nan ta bin bisti den colornan neutral. Algo cu antes bo no tabata mira. Antes tabatin mucho mas bandera, tshirts etc. E biaha aki esey no tabatin esey" Rosaria a bisa. Ta como sifuera hende tin miedo pa mustra nan color. "E ta enberdad mustra un cultura di miedo", Rosaria a confirma pa e portal aki. Ta di warda e resultadonan final, y mira si enberdad tabatin sorpresa, y mas importante aun, ki tipo di sorpresa el a bira. Keda pendiente pa mas di e cobertura di NoticiaCla.com, Power FM y Power TV di Eleccion parlamentario di Corsou 2016.