Lama bruto a subi tera na Malmok y causa daño

MALMOK -Ora cu tur hende a kere cu horcan Matthew a pasa y su efectonan ta pa pasado, diamars mainta lama pasuid di Aruba a lanta asina bruto, cu ela te hasta subi tera, pasa caminda na e.o. Malmok. Tin areanan cu el a tira yen di strea di lama te riba caminda. Habitantenan no tabata sa kico nan tabata mira. Hopi a kere cu tin un otro tormenta cu ta na caminda cu nan no tabata na altura di dje. No ta solamente na Malmok, sino tambe mas pariba na e.o. e islanan conoci manera de Palm Island y Renaissance Island. Aki tambe lama tabata haci fastioso. Den caso di Renaissance Island, e gerente a confirma na NoticiaCla.com cu nan ta 'monitor' e situacion di cerca, pero cu e isla ta habri normal. For di bishitantenan di de Palm Island, a compronde cu a limita acceso na cierto parti di e lama, debi na e situacion bruto. Parti di e beach ta cera. 

Bek na Malmok, organisacionan tabata pidi asistencia di hende pa yuda gara e 'streanan di lama' cu lama bruto a tira riba tera, y pone nan bek den lama.