CITGO Aruba/Aruba Refinery: Comienso di un era nobo!

SAN NICOLAS - Apenas 3 dia despues cu nan a bira e huurdo di e facilidad, e compania CITGO Aruba a cambia e prome di varios letrero, oficialisando e acto aki mas ainda. Diasabra ainda e letrero tabata lesa 'Valero'. Pero pa dialuna, esaki a cambia pa CITGO Aruba/Aruba Refinery. Cu esaki e refineria ta cuminsa un era nobo. 

TRAMITE

Diabierna dia 30 di september 2016 e tramitenan cu ta regarda reapertura di refineria door di CITGO USA, establecimento oficial di RDA NV y traspaso di tereno di Valero a keda oficialisa pa medio di un acta notarial. Esaki ta e procedura legal cu mester a tuma luga despues cu Staten di Aruba a aproba den forma casi unanime reapertura di e refineria.

RDA

Tambe a lanta e compania estatal cu ta haya e nomber Refineria di Aruba (RDA) y e terenonan di Valero ta bay over pa gobierno cu ta pas'e pa RDA cu, na su turno, ta lease mayoria di e terenonan aki cu CITGO USA. Presente na e ocasion special aki tabata Ministernan Mike Eman, Benny Sevinger y Angel Bermudez, Kandidaat notaris mr Chamilla Tromp di oficina di notario Johnson, ehecutivonan halto di CITGO USA, di Valero, sr Alvin Koolman di RDA y abogadonan di tur partido envolvi cu tabata repasa e documentonan un pa un prome cu nan por a wordo firma. Cu e ultimo firmanan aki e refineria a bira oficialmente propiedad di Aruba dia 1 di october 2016. Awor trabou ta start. FOTO CORTESIA HILARIO DONCKER.