James Fazio ta CEO nobo di aeropuerto di Aruba

ORANJESTAD – Minister di Transporte Otmar Oduber a confirma e noticia di NoticiaCla.com dialuna merdia, esta cu James Fazio a keda apunta como e CEO nobo di Aeropuerto Reiba Beatrix. Esaki ta drenta na vigor entrante 1 di september proximo y ta pa un periodo di 5 anja. Fazio tabata e Chief Operations Officer na JFKIAT, e Operator Terminal 4 na John F. Kennedy Airport na New York. Den e posicion aki James Fazio ta responsabel pa e operacionnan diario y planeacion strategico di Terminal 4 di JFK Airport.

Sr. Fazio a uni su mes na JFKIAT na 1997 y anteriormente el a traha pa The Port Authority di New York y New Jersey den diferente posicionnan di supervision. Minister Oduber ta remarca cu e contrato cu Jim Fazio ta pa un periodo di 5 aña durante cual banda di su responsabilidadnan como CEO el lo tin e tarea di guia personanan cu lo por fungi como un proximo director local.

Den e cuadro aki e mandatario a informa tambe cu tin un condicion nobo unda cu entrante 1 di december aeropuerto lo conta cu no uno so, pero cuatro miembro di directiva. Es decir James Fazio lo ta e CEO y lo tin un directiva hunto cune cu ta consisti di tres miembro local. E desaroyonan nobo y positivo aki ta bin na un momento clave unda cu den e proximo 5 aña aeropuerto ta invertiendo un suma di 165 miyon Dollar den diferente proyecto, entre cual por menciona cu esunnan mas grandi ta e TSA/US Pre clearance, dos gate nobo, extencion di e Apron na e banda west y e fuel hydrant.