Financiamento Green Corridor por keda cla na september

ORANJESTAD – Contrario na loke ta wordo menciona rond, director di Dienst Openbare Werken Ing. Marlon Croes a sigura cu Gobierno lo no haci ningun pago pa e proyecto aki tanten cu e Green Corridor no ta completamente cla y den uzo door di e poblacion di Aruba. E compania responsabel pa e green corridor, Odinsa, ta den proceso pa busca financiamento pa e proyecto. Pero pa no perde tempo, a cuminsa cu e trabouban inicial y esaki ta avansando rapidamente. Ta conoci cu cualkier compania cu haya e trabou, y bira e asina yama ‘preferred bidder’ tin cu percura pa e financiamento.

Na momento cu Aruba a scoge Odinsa como e "preferred bidder", esaki ta encera tambe cu e compania mester percura pa financiamento di e proyecto.Mientras cu Odinsa ta den e fase di buskeda di financiamento, cual ing. Marlon Croes ta kere lo keda cla final di september pa cuminsamento di october, a cuminsa cu un proyecto di pre-work. E fase aki ta encera construccion di e caminda di conexion entre Seroe Thijsjie y Barcadera. Por constata cu ya caba e caminda a wordo asfalta y iluminacion ta cla.

Na mesun momento a pidi Odinsa pa extende e fase di pre-work pa inclui construccion di biaha e rotonde na e caminda grandi, riba Seroe Thijsjie. Pa esaki ta den negociacion cu e compania Odinsa. E Green Corridor ta core for di aeropuerto te cu San Nicolas y ta e infrastructura necesario pa cumpli cu e demanda y crecemento cu Aruba a conoce ultimo decada. Ta wordo calcula cu e proyecto lo por ta cla pa final di 2016 y cuminsamento di 2017.

E caminda di Oranjestad pa San Nicolas ta uno hopi bieu mientras cu estadisticanan ta mustra cu esaki ta un area di hopi accidente fatal. Gobierno, y como profesional Marlon Croes ta contento di por ta envolvi, kier contribui na mehora siguridad di e pais y esaki ta creando un caminda di 4 via den un area hopi uza. E Green Corridor lo percura pa un miho fluho di trafico y e tempo di espera na skinanan ta baha. Cifranan ta mustra, segun ing. Marlon Croes di DOW, cu e cantidad di di vehiculo pa persona (averahe) na Aruba ta hopi halto, pa cual e caretera nobo aki tabata uno hopi necesario.