Horcan Matthew a laga 32 mm di awa atras na Aruba

ORANJESTAD - A pronostica entre 10 pa 40 mm di awacero pa Aruba relaciona cu e pasada di horcan Matthew, y a cay 32 mm, pues tabata basta serca di e pronostico. Servicio Meteorologico di Aruba ta siguiendo di cerca ainda horcan Matthew ubica 8’ or di mainta mas o menos na 150 km Noord-Noordwest di Aruba. Matthew ta moviendo westzuidwest cu 22 km/hora, cu bientonan maximo rond di e centro di 165 km/ora. Un alerta pa tormenta tropical lo wordo cancela pa awe mainta 11'or.

Alerta: Un aviso pa boto chikito ta keda balido. Alerta: Un aviso pa inhundacionan di termino corto ta keda valido te diasabra marduga.

Pronosticonan:

Diabierna: Parcialmente nubla te basta nubla. Chens pa awacero compania cu lamper y strena. Biento di zuidwest alrededor di 18 kts, cu rafaga te 35 kts, den mainta, cambiando pa zuidoost 15 kts, cu rafaga te 28 kts, den atardi. Posibilidad di awa 60 %.

Diabierna anochi pa diasabra: Parcialmente nubla te basta nubla. Chens pa awacero compania cu lamper y strena. Biento di zuidoost alrededor di 18 kts, cu rafaga te 28 kts. Posibilidad di awa 60 %.

E ultimo aviso y resumen tocante e situacion di tempo tropical lo wordo emiti diabierna mainta 11 am esey lo bira boletin nr 10. E boletinan di prensa relaciona cu e sistema tropical ta wordo haci den coordinacion cu Minister di Transporte, O.E.Oduber y Minister di Asuntonan General M.Eman.