Prome impresion di efecto di horcan Matthew na Aruba

ORANJESTAD - Playa y bisindario a experencia e prome efectonan 'minimal' di horcan Matthew den oranan di marduga. Cu excepcion di algun area na hotel unda cu lama a subi tera y pasa door di un parti di hotel, no por papia di mucho daño di awa. Por lo menos no riba camindanan cu normalmente ta conoci pa inundacion. Esey ta conta tambe pa Madiki unda cu e biaha aki varios area eynan, a keda relativamente bon. Aki aya algun caminda awa a para, pero nada compara cu den pasado ora cu e lugarnan keda inunda. 

STRENA CU LAMPER

Hopi caminda a haya palo di awa, aunke no tabatin e 'acostumbrado' strena cu lamper tur caminda cu normalmente ta laga hopi area sin coriente. Malmok tabata un di e areanan cu si a haya problema cu coriente, pero grandemente por bisa cu e situacion ta bou di control. Keda pendiente pa un relato di e situacion 'pariba di brug'. 

SITUACION NO TA CLA

Mester alerta si cu e situacion no ta 'bek pa normalidad' ainda, pues mester keda vigila e situacion di tempo gran parti awe ainda, te ora cu haya e 'ok' cu nos ta completamente for di e efecto di e horcan.