Prome daño den anticipacion di 'yegada' di horcan Matthew

ORANJESTAD - Casi mey anochi di diabierna, manera anticipa, lama banda sur di Aruba a bira bruto y cuminsa causa destruccion. Entre nan, un pa dos palapa a cay venci contra e forsa di e resake cu a cuminsa, como anticipacion di e 'yegada' di horcan Matthew. Hopi ta esnan cu a dicidi di bay haci 'co'i kaweta, y bin mira kico lama tabata haci. Na altura di Eagle beach, tabata bisto cu lama a haci su trabou y subi y recobra gran parti di e beach caba. Varios 'piscina natural' tabata e resultado di e resake cu a keda pronostica mas tempran pa autoridad di meteorologia. E situacion di lama lo empeora den curso di marduga pa mainta na lama, cu olanan di por lo menos 3 pa 4 meter segun pronostico. A pidi tur hende pa no drenta lama, sea pa surf of landa. "Nos no ta Hawaii" premier Eman a bisa mas tempran durante un conferencia di prensa.