Eman: Aruba lo haya hopi awa, biento y ola grandi

ORANJESTAD - Cu palabranan manera 'ta cuestion di ora' (prome cu e horcan yega cerca) y 'nos lo ricibi hopi awa, biento y ola grandi', un prome minister Eman visiblemente preocupa, a duna su ultimo mensahe pa pueblo diahuebs anochi. E ultimo 'briefing' aki tabata hopi cla: Cos ta serio, y ora cero ta yegando. E mandatario a bay asina leu di duna un estimacion di e ora cu nos por spera 'e parti mas fuerte' cu ta 5or di marduga. Cu tur miembro di e team compone pa varios departamento crucial, Eman a mustra cu nan a haci tur loke nan por a haci, y awor tin cu warda e horcan yega y spera cu tur preparacion tabata 'por nada'. Mientras cu e no ta un sciencia exacto, experiencia a mustra cu por spera tur sorto di cos, y tambe cosnan cu no a spera. 

PREPARACION 

Loke a resalta tambe, diferente di e otro biahanan, tabata e relato specifico y detaya di cifra di e.o. hende y material cu ta preparando of ta prepara pa 'confronta' e efecto di horcan Matthew. Ministerio di defensa a ofrece Marinierskazerne como un centro di preparacion, total cu 200 soldat (mariniers) cu lo ta pendiente henter e trayecto si mester. Tambe KPA tin total di 360 polis riba pia den dos team di 180 persona. Hopi a ofrece nan dianan liber, vakantie pa nan por duna un man cu e situacion cu por spera nos. Un total di 4 post di ambulance a keda reparti riba henter nos isla pa asina cubri e isla completo. 

DIA LIBER

Loke tabata un discusion practicamente henter dia, a haya un confirmacion anochi ora cu Eman a confirma cu departamentonan di gobierno lo ta liber diabierna, te unda cu ta duna (excepto departamentonan cu ta core warda). Kier evita tambe asina pa departamentonan cu no mester ta riba caminda, laga esaki liber pa esnan cu mester, por haci nan trabou. A haci un peticion na comercio pa tambe coopera pa duna liber unda cu por, pa asina esnan cu tin cu labora, tin menos preocupacion na nan cabes. E no por a obliga comercio pa cera, pues a haci e apelacion di e miho forma posibel. Awor ta keda na naturalesa y horcan Matthew pa tuma su curso y wak con esaki lo afecta nos isla. 

POST DI OPERACION

Mientras cu gobierno no a activa e plan di calamidad ainda, Eman a sigura NoticiaCla.com cu nan tin un centro operacional unda cu tur departamento lo bin hunto. Prensa a haya acceso tambe na e centro aki, pero esaki cu hopi seguridad y control pues solamente esnan cu a keda registra diaranson anochi, por drenta e centro aki.