Defensa Hulandes cla pa asisti den caso di emergencia

ORANJESTAD - Asistencia prome, durante y despues di pasada di un sistema tropical ta un di e tareanan principal di dept di defensa Hulandes den Caribe. Awor cu e tormenta tropical Matthew ta yegando islanan ABC, militarnan den teritorio Caribe ta cla pa asisti, segun e departamento a informa diahuebs merdia.  

TRABOUNAN ENCERA

Evacuacion di hende, haci caminda limpi di posibel obheto of inundacion, e limpiamento di sushi y bahia ta parti di e trabou cu marina tambe lo haci. E mariniernan di e di scuadron 32 y di e asina yama landmachtcompagnie, e militia di Aruba y Corsou ta cla pa asisti.  Aña pasa e bapor di sosten Zr.Ms Pelikaan a asisti e isla di Dominica despues di pasada di tormenta tropical Erika. Tambe a asisti Corsou na 2010 despues di pasada di tormenta tropical Tomas.  

AYUDO RELACIONA CU MATTHEW 

Awor cu e tormenta tropical Matthew ta yegando islanan ABC, y ta menasa cu hopi inundacion, militarnan ta cla pa asisti cu nan material. Pa esaki tabatin contacto caba cu gobierno di tur tres isla. De hecho prome minister Mike Eman a confirma diaranson anochi cu el a firma e peticion caba pa asistencia, en caso si tin mester.