Ta spera yobida di entre 5 pa 40 mm cu por ta mas localmente

ORANJESTAD - Servicio Meteorologico ta siguiendo di serca  Tormenta Tropical Matthew ubica 5’ or di diahuebs mainta na 14 noord i 64.7 west cu ta na mas o menos na 595 km oost noordoost di Aruba. Matthew ta moviendo west  14 nudo/26 km/h, cu bientonan maximo rond di e centro di 100 km/ora. 

Un alerta pa tormenta tropical ta na vigor pa aruba; esaki kier men cu condishonan di tormenta tropical ta posibel den proximo 36 pa 48 hora alerta: un aviso pa boto chiki ta na vigor

Matthew su movecion ta depende di dos factor.

1. Un sistema frontal cu lo sali for di Merca diahuebs/diabierna.

2. Un area di presion halto ubica riba mar atlantico.

Te na e momentonan aki ta calcula cu Matthew su centro di circulacion lo por pasa mas o menos na un distancia di 150 pa 200 km noord di Aruba den curso di diabierna mainta tempran.

Tormenta Tropical Matthew lo hasi e aire mas humedo i instabiel,  aumentando  chens pa awacero pa e proximo dianan. Biento lo boltia tambe i lama por bira brabo.

Pronosticonan:

Diahuebs:

Parcialmente nubla. Chens pa awacero compania cu lamper i strena den mainta. Menos mihor chens awa cu lamper i strena den atardi. Biento di noord-noordoost alrededor di 9 kts, cu rafaga te 19 kts,in mainta, cambiando pa west-nortwest den atardi. Posibilidad di awa 60 %. 

Diahuebs anochi pa diabierna marduga:

Parcialmente nubla te basta nubla. Chens pa awacero compania cu lamper i strena principalmente den marduga. Biento di west alrededor di 13 kts, cu rafaga te 23 kts, den anochi, cambiando pa west-zuidwest despues di marduga. Posibilidad di awa 60 %. 

Diabierna:

Parcialmente nubla te basta nubla. Chens pa awacero compania cu lamper i strena. Biento di zuidwest alrededor di 18 kts, cu rafaga te 28 kts, den mainta, cambiando pa zuidoost 15 kts, cu rafaga te 28 kts, den atardi. Posibilidad di awa 70 %. 

Diabierna anochi pa diasabra:

Parcialmente nubla te basta nubla. Chens pa awacero compania cu lamper i strena. Biento di zuidoost alrededor di 18 kts, cu rafaga te 28 kts. Posibilidad di awa 70 %. 

Posibel efectonan di e pasaje di Matthew :

-Por spera yobida di entre 5 pa 40 mm cu por ta mas localmente.

-Lama lo bira bruto dependiendo di e distancia cu e sistema aqui pasa lo por tin olanan di entre 8 pa 12 pia na cierto partinan di costa.

-Dependiendo di e distancia cu e sistema pasa di Aruba por tin biento cu rafaga te 34 nudo (Beaufort 6 te 8).

Ta avisa pueblo di Aruba pa keda pendiente pa boletinan official di tempo di gobierno via e canalan official di gobierno.

Servicio Meteorologico di Aruba ta den contacto cu diferente otro servicio meteorologico di e regio, National Hurricane Center na Miami i KNMI. Indicacion ta cu ora e sistema pasa Aruba panoord di Aruba e lo ta un orcan debil.

Un proximo aviso tocante e situacion di tempo tropical lo wordo emiti mayan  mainta 11 am, esaki lo bira boletin nr 7.

E boletinan di prensa relaciona cu e sistema tropical ta wordo hasi den coordinacion cu Minister di Transporte, O.E.Oduber i  Minister di Asuntonan General M.Eman.