Rapport final CFT cla mitar di september

ORANJESTAD – E rapport final di secretariado di College Financieel Toezicht riba presupuesto di Aruba ta keda cla mitar di september esta di dos siman y lo wordo entrega e ora ey na gobernador. Esaki Noticiacla.com a compronde di su fuentenan fidedigno hopi serca na e investigacion y cu esaki ta debi na e retraso cu e comision a sufri basa riba e investigacion pasobra gobierno no a coopera. Awor cu gobierno di Aruba ta cooperando cu e investigacion, trabounan a continua, pero cu e consecuencia menciona. E rapport mester tabata cla pa final di Augustus pero esey obviamente no ta e caso mas.

Unabes cu e rapport keda cla, e ta wordo presenta na gobernador Freddis Refunjol, cu na su turno, lo presente na gobierno di Aruba pa comentario. Dependiente di e comentario di gobierno, e lo tuma e siguiente pasonan. Entre e pasonan por ta cu e ta presenta e rapport na gobierno di Hulanda pa sea 1. Destrui e presupuesto, 2. Continua cu e presupuesto cu adaptacion haci pa gobierno y firma e presupuesto. Na tur e proceso por tuma un pa dos siman mas cu ta pone cu final di september mester tin un claridad riba kico ta pasa cu e presupuesto di Aruba.

Paralelo na e proceso aki, tin e proceso di presupuesto 2015 cu tambe ta canando su caminda. Mientras cu e no a yega gobernador ni Raad van Advies ainda, e intencion di e mandatario na cabes di e ministerio di finanza, Angel Bermudez, ta pa keda cla y pasa esaki segun regla, cu ta comienso di luna di september. Di otro banda, Bermudez a alerta caba publicamente cu debi na e situacion di presupuesto 2014, y e factor di vakantie, e no tabatin e personal necesario pa por a agilisa e trabounan pa keda cla na tempo. Cu esey, ta nifica cu tin e posibilidad cu e presupuesto di 2015 tampoco lo keda entrega riba e fecha specifica. NOticiacla.com a compronde cu si e presupuesto wordo entrega e siman aki ainda na Raad van Advies, lo duro por lo menos 3 pa 4 siman prome cu e por keda cla pa tratamento den parlamento. Como tal di ningun forma, e presupuesto 2015 lo keda cla pa wordo entrega 1 di september proximo.

For di momento cu presupuesto 2014 a keda aproba pa parlamento di Aruba na juni ultimo, e no a keda firma y oficialisa sino mas bien a tranca ora cu gobernador a opta pa pidi CFT pa investiga esaki prome cu e dicidi di firma esaki. Motibo principal ta cu segun gobernador di Aruba (y despues gobierno di Reino) a sinti cu e presupuesto no a cumpli cu palabracionnan haci. E asunto aki a crea un impasse di tal magnitud cu gobierno di Aruba a dicidi di bay den defensa formal contra tanto gobernador y gobierno di Reino, y hunto cune, crea un impasse entre e dos paisnan den Reino. Un impasse cu ta drentando su di 7 siman.