Marcha nacional posponi pa otro fecha debi na Matthew

ORANJESTAD - Comision ProSiguridad kier informa comunidad di Aruba en general, cu en coneccion cu e ultimo desaroyonan di e tormenta tropical Matthew, e Marcha Nacional contra criminalidad ta wordo posponi te cu dia 13 di October. Comision ProSiguridad tabata reuni na mesun momento cu e conferencia di prensa, cu a wordo yama ayera nochi pa 8'or, cu caracter di urgencia a tuma lugar.  

Despues di a scucha Alto mando di Polis, representa den e persona di Dolfi Richardson, nos comision a dicidi di cambia e fecha di e Marcha Nacional, cual intencion ta exigi siguridad na Aruba back. Comision ProSiguridad, den su sano huicio y preocupa cu e bienestar di nos hendenan, ta compronde cu cuerpo policial lo ta man yen atendiendo e necesidadnan di nos pueblo.  Nos ta haci un yamado pa tur hende keda trankil na cas cu nan famia. E siguridad di Aruba den tur sentido ta nos prioridad.  Keda pendiente si pa mas informacion tocante e Marcha Nacional, dia 13 di October na PostKantoor pa 4pm.