Cuerpo policial ta prepara pa e manifestacion di diahuebs

ORANJESTAD - No tin ningun indicacion cu e manifestacion di diahuebs contra criminalidad y violencia ta cancela debi na e mal tempo. E ta un di e preguntanan cu a bin dilanti durante e conferencia di prensa diaranson anochi riba e situacion di tormenta tropical Matthew. Mirando cu tur actividad ta den proceso di wordo cancela, a puntra Alto mando di polis Dolfi Richardson riba esaki. Pero e hefe maximo di polis a splica cu e no a haya ningun peticion of indicacion cu e manifestacion a wordo cancela of mester wordo cancela.  Segun Richardson, e manifestacion ta sigui. "Nos ta cla p'e" Richardson a bisa. "Nos punto di salida ta cu nos ta laga esey na e sano huicio di e organisador pa wak si nan ta sigui cu e manifestacion. Si nos mira cu e ta bira peligroso, nos lo para esey" Richardson a bisa. E ta conciente cu tempo no ta un sciencia exacto pues no por bisa ki ora e tempo ta empeora, te pa para e evento. E orario di e manifestacion contra violencia y criminalidad ta poni entre 4'or pa 7'or pa asina e por caba prome cu solo baha.