Prome wega di campeonato futbol cancela debi na Tormenta Matthew

ORANJESTAD - "E situacion ta for di nos man, pero nos ta convenci cu no ta responsabel inicia nos campeonato bou di e condicionnan di tempo manera ta mustrando ki", asina Richard Dijkhoff, Presidente di Arubaanse Voetbal Bond (AVB) a duna di conoce. Debi na e situacion di mal tempo menasando nos isla, ta pospone inicio di campeonato 2016-2017 cu un siman, esta pa diabierna dia 7 di october 2016.

Di acuerdo cu e agenda di AVB, un total di 28 ekipo lo bataya contra otro den e campeonato di futbol division di honor cu ta start na october y lo sigui te mas o menos juni otro aña.

E intencion ta pa cuminsa e campeonato manera cu ela termina, esta cu e dos ekiponan cu a bay final, SV RCA contra SV Dakota, respectivamente e campeon y sub campeon di e campeonato 2015-2016. Cu esaki e fanaticonan ta invita pa mira e wega di revancha aki, cu ta tuma luga dia 7 di october pa 8:00 pm den Stadion Guillermo P. Trinidad na Dakota.

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.