Meteo: Matthew su centro por pasa 150 pa 200 km di Aruba

ORANJESTAD - Servicio Meteorologico ta siguiendo di cerca recien forma Tormenta Tropical Matthew ubica 11’ or di mainta na 13.4 noord y 60.7 west cu ta na mas o menos na 55 km zuidoost di St. Lucia; e distancia aki ta ta menos  960 km oost di Aruba. Matthew ta moviendo west cu 33 km/hora, cu bientonan maximo rond di e centro di 95 km/ora.

Matthew su movecion ta depende di dos factor.

1. Un sistema frontal cu lo sali for di Merca diahuebs/diabierna.

2. Un area di presion halto ubica riba mar atlantico.

Te na e momentonan aki ta calcula cu Matthew su centro di circulacion lo por pasa mas o menos na un distancia di 150 pa 200 km noord- noordoost di Aruba den curso di diahuebs laat pa diabierna.

Tormenta Tropical Matthew lo haci e aire mas humedo y instabiel,  aumentando chens pa awacero for di diahuebs atardi. Den e periodo di diahuebs pa diadomingo biento por boltia tambe y lama tambe, pues lama lo por bira bruto hasta banda di areanan di hotel, cu normalmente ta protegi.

Dor cu Matthew ta relativamente basta leu, por bin cambionan den e efectonan cu e lo bai tin riba e tempo na Aruba.  Sinembargo, por spera rafaga di biento durante di awacero cu por yega forsa modera te fuerte (Beaufort 6 te 7, 22 te 33 nudo). Awacero lo bay compaña pa strena cu lamper y por causa inundacion temporal den cierto caya of barionan di e isla.

Posibel efectonan di e pasahe di Matthew :

-Por spera yobida di entre 10 pa 40 mm cu por ta mas localmente.

-Lama lo bira bruto dependiendo di e distancia cu e sistema aki pasa lo por tin olanan di entre 8 pa 12 pia na cierto partinan di costa.

-Dependiendo di e distancia cu e sistema pasa di Aruba por tin biento cu rafaga te 33 nudo (Beaufort 6 te 7).

Ta avisa pueblo di Aruba pa keda pendiente pa boletinan oficial di tempo di gobierno via e canalan official di gobierno.

Servicio Meteorologico di Aruba ta den contacto cu diferente otro servicio meteorologico di e regio, National Hurricane Center na Miami y KNMI.

Indicacion ta cu ora e sistema pasa Aruba, e por haña mas forsa y bira Orcan.Un proximo aviso tocante e situacion di tempo tropical lo wordo emiti awe tardi 6 pm, esaki lo bira boletin nr 5. E boletinan di prensa relaciona cu e sistema tropical ta wordo haci den coordinacion cu Minister di Transporte, O.E.Oduber y Minister di Asuntonan General M.Eman.