Accion di abogado por afecta casonan penal diahuebs

ORANJESTAD - Abogadonan cu ta core piket a drenta nan di dos siman di accion, cu ta nifica cu e por tin consecuencia pa casonan penal e siman aki. Den combersacion cu abogado Hose Figaroa, ela confirma cu e prolongacion di e accion e siman aki ta nifica cu no ta trata casonan andando tampoco, banda di esnan nobo. "E efecto di esey lo wordo sinti mayan como cu diahuebs y diabierna normalmente casonan penal ta  tuma lugar na corte" Figaroa a bisa. Un caso grandi cu tin cu tuma lugar, tin tres acusado cu mester abogado di piket, pero cual lo no presenta. Mientrastanto minister di asuntonan social Paul Croes invita e grupo di abogado pa reuni awe tardi 2'or  pa papia riba e tema. Croes ta e abogado cu tin na su encargo e areglo den e caso aki. 

CASONAN POR DEPENDE DI REUNION

Segun Figaroa, tur cos ta depende di e reunion cu e mandatario. Pero te na e momentonan ey, e accion ta keda vigente. Mester bin acuerdo concreto pa por para e accion. "Tanten cu nos no tin un toezegging concreto cu ta bay di acuerdo cu nos peticion, nos accion lo sigui. Si acaso tin toezegging, of algo diferente, lo evalua cu e miembronan pa evalua si ta bin cualkier cambio den e accion" Figaroa a bisa. Motibo cu ta papiando cu minister Croes y no minister di husticia Arthur Dowers, ta pasobra ta trata di algo financiero social. "Pago di piket ta cay bou di ministerio di social, nos a dicidi di aserca minister ey" Figaroa a bisa. A confirma cu tur abogado ta sosteniendo e causa aki. Gobierno a aserca dos pa tres abogado pa trata casonan, pero ambos a nenga di haci esey. 

CASONAN  DEN CORTE DIAHUEBS

E casonan penal por continua diahuebs solamente si e cliente bisa cu e kier defende su mes of e kier haci e caso sin abogado. Pero na momento cu e cliente bisa cu e kier un abogado, corte mester pospone e caso sino e no ta cumpliendo cu e esencia di un 'fair trial'. Te cu awor, no por confirma cu corte a cancela casonan pa diahuebs, aunke otro medionan ta raportando esey. NoticiaCla.com a compronde di ministerio publico cu no ta na nan pa dicidi si casonan ta sigui diahuebs (y diabierna), pero ta na corte pa dicidi. NoticiaCla.com no a logra haya e confirmacion ey.