Reaccion director WEB no a cay den bon tera serca SIWA

ORANJESTAD - E declaracion y reaccion di director di WEB, Luis Oduber diamars, no a cay den bon tera cerca presidente di e sindicato SIWA, cu ta representa e trahadonan di e compania di utilidad. Erick Henriquez a reacciona cerca NoticiaCla.com despues di a tende e reaccion, y un pa un a refuta e declaracionan haci pa Oduber. Entre nan, cu nunca no a entrega agenda punten, cu a bisa cu a manipula e rason pa tene reunion siman pasa diabierna, y cu a ataca e minister durante un reunion diasabra ultimo. Un pa un a desbarata esaki. Segun Henriquez, cada cos cu a wordo menciona, por a prueba esaki cu prueba. 

FRECUENCIA FM OF AM

Problema segun Henriquez, ta cu - manera director di Utilities a declara diasabra ultimo - sindicato y gerencia no ta riba e mesun frecuencia al estilo AM y FM. "Nos tin cu wak con nos ta yega pa nos tur dos ta riba e mesun frecuencia pa nos cuminsa compronde otro" Henriquez a bisa, pasobra segun e lider sindical nan tin cu traha cu otro un forma of otro. 

BLOKI 

Segun Henriquez, pa loke ta e CFO ningun momento e sindicato a reclama e nombramento di e CFO. "Na ningun momento. Loke nos ta reclama ta cu momento e CFO bin, y bo move e otro departamentonan bou di dje'le, (tin prueba di un memo), cu ta contra e condicion di e CAO si no atende e asunto cu e sindicato, prome cu tuma e desicion aki. "Esey nunca no a pasa" Henriquez a bisa. Lo bay analisa e situacion pa wak unda nan ta para. A saca un carta interno prome cu Oduber a haci su declaracionan diamars ultimo, pa bisa cu ta dispuesto pa sinta na mesa, aunke no a bisa cuanto tempo lo duna pa partidonan sinta na mesa. NOTA: Foto cortesia bondia24.om