Ley di CITGO aproba cu 19 voto pro y 1 contra

ORANJESTAD - Cu 19 vota pro y 1 contra, Parlamento pa un cuarto pasa di 11 di diamars anochi a acepta e ley cu ta oficialisa reapertura di refineria. E unico parlamentario cu a vota contra, tabata e parlamentario independiente Marisol Lopez Tromp. Lopez a mustra cu mientras cu e kier progreso, e no por haya su mes den e ley aki y ta boga sinembargo pa un otro forma di progreso di sostenibilidad. Banda di e ley, a pasa tambe un total di 5 mocion den forma unanime, y rechasa uno cu 11 voto contra y 9 pro. Tambe a vota riba 4 amienda, aprobando 2 y desaprobando 2. Esaki ta nifica cu awor gobierno di Aruba ta bira doño di e refineria y cu nan por lease esaki na CITGO pa e periodo menciona di 15 aña. E tratamento a cuminsa dialuna merdia 1:30 pm y a caba 10:30 e mesun anochi, y continua diamars mainta 10:30 am.

MEP

Mientras cu fraccion di oposicion MEP tambe a aproba e ley, nan tabatin nan comentario. "MEP a sostene pasobra nos ta para pa Aruba, y nos ta para pa San Nicolas. Cu nos ta contento cu e deal? No! Pero na caminda nos ta mehor'e, nos lo elimina e riesgonan di e garantianan, nos lo bin cu leynan pa medio ambiente y siguridad di trabou. Nos a compromete pa habri e refineria y nos a cumpli" Evelyn Wever a bisa na final.