Lo activa ekipo di calamidad si situacion ola tropical empeora

ORANJESTAD - Miembronan di gabinete Mike Eman 2, acompaña pa miembronan di varios departamento cu ta forma e 'ekipo di calamidad' manera meteorologo Marck Oduber, hefe di bombero Edward de Cuba, hefe interino di rampenbureau Rino Hermans a reuni gran parti di merdia/atardi y despues tene un conferencia di prensa riba e situacion di tempo cu ta na caminda pa e.o. Aruba. Mes momento a clarifica si cu no a 'activa' e team di calamidad. Si e situacion di tempo empeora, prome minister Eman lo duna e señal y activa esaki mesora. Ainda no tin necesidad pa esaki. 

SITUACION DI E OLA TROPICAL

Actualmente Servicio Meteorologico ta siguiendo di cerca un area di presion abou ubica na mas of menos 450 km oost di Barbados; e distancia aki ta menos cu 2000 km oost di Aruba.

Te cu awe tardi e sistema aki ta moviendo west te west- noordwest.

E sistema tropical aki su movecion ta depende di dos factor.

1. Un sistema frontal cu lo sali for di Merca diahuebs/diabierna.

2. Un area di presion halto ubica riba mar atlantico.

FALTA DI CIRCULACION

Te cu awe diamars atardi e indicacion ta cu e sistema tropical lo aumenta den forsa; sinembargo e ta carece di un circulacion cera y no por a ser clasifica como un ciclon tropical. Pero dado caso a sigui aumenta di forsa, y bira un ciclon tropical, su centro di circulacion lo por pasa mas of menos 150 pa 200 km noord di Aruba den curso di diahuebs laat pa diabierna.

AUMENTO DI AWACERO FOR DI DIAHUEBS

Ultimo indicacion ta cu e sistema tropical aki por haci e aire mas humedo y instabil, y aumenta nos chens pa awacero for di diahuebs. Den e periodo di diahuebs pa diadomingo biento por boltia tambe y lama tambe, pues lama por bira bruto hasta banda di areanan di hotel, cu normalmente ta protegi.

POSIBEL INUNDACION

Door cu e sistema ta debil ainda y mester desaroya y ta relativamente basta leu, ta dificil pa duna un bista exacto ainda ariba e efectonan. Sinembargo, cu desaroyo of no por spera rafaga di biento durante di awacero cu por yega forsa modera te fuerte (Beaufort 6 te 7, 22 te 33 nudo). Awacero por causa inundacion temporal den cierto caya of barionan di e isla.

KEDA PENDIENTE PA BOLETIN OFICIAL

Ta avisa pueblo pa keda pendiente pa boletinan oficial di tempo di gobierno via e canalan oficial di gobierno.

Servicio Meteorologico di Aruba ta den contacto cu diferente otro servicio meteorologico di e regio, y KNMI.

Adicionalmente a tuma contacto cu awemainta y awetardi cu National Hurricane Center na Miami y KNMI.

Un proximo aviso tocante e situacion di tempo tropical lo wordo emiti mayan mainta 11.30 am.

Si ta necesario lo emiti un otro boletin prome.

E boletinan di prensa relaciona cu e sistema tropical ta wordo haci den coordinacion cu Minister di Transporte, O.E.Oduber y Minister di Asuntonan General M.Eman.