Gerencia di WEB sorprendi cu expresionnan di sindicato SIWA

ORANJESTAD – SIWA, e sindicato di empleadonan di WEB Aruba, diabierna ultimo a sorprende Gerencia di WEB cu un ”reunion informativo”. Despues di a puntra pa ki motibo, e presidente di SIWA a informa gerencia di WEB cu lo ta pa pidi sosten di miembronan pa participa na un manifestacion contra criminalidad. Unabes cu SIWA a logra haya tur su miembronan pafo, di ripiente e reunion a bira un manifestacion contra Gerencia y Minister di Utilidad, sigui pa un cantidad di insinuacion sin base. Asina director general di WEB, Luis Oduber a informa durante un conferencia di prensa awe mainta na WEB. Gerencia di WEB durante e conferencia a duna su banda.

Ta lamentabel cu Gerencia ta tende via medionan di comunicacion cu nan lo ta “sumamente arogante”, pero cu SIWA no ta menciona pa ki motibo nan ta pensa asina. Asina tawatin varios otro acusacion, cual e director general di WEB a aclarea y contraresta. E presidente di SIWA a menciona cu ta “bay drenta momentonan poco fastioso” y cu miembronan di SIWA lo no ta informa y tambe rabia. Sr. Oduber a indica cu lo aprecia si SIWA por splica pakico nan ta pensa asina y di unda e preocupacion aki ta bini. Tur luna, gerencia di WEB ta reuni cu SIWA cu e palabracion cu tur dos partido tin cu avisa adelanta ki topico of tema nan ta desea di dialoga riba dje. Mester remarca cu 22 di september ultimo, tawata e prome biaha cu SIWA a manda su puntonan di agenda di antemano. Di parti di Gerencia si a bin ta haci esey. Ta urgi SIWA pa sigui cumpli cu e palabracion di manda puntonan di agenda di antemano. Esaki lo conduci na menos malinterpretacion y sintimento di arogancia. 

CONFUSION 

Presidente di SIWA a declara den prensa cu e accion “ta escala pa haña atencion di Minister”. Esaki ta haci su declaracionnan confuso pa Gerencia. Kico tawata e motibo real pa e walkout: (1) pidi respaldo pa e manifestacion contra criminalidad, (2) reclama Gerencia pa algo cu Gerencia a atende caba, of (3) pa haña atencion di Minister di Utilidad? Presidente di SIWA ta bisa cu mester trata otro serio na mesa. Sinembargo ta scoge pa sali pafo y haci declaracionnan mientras ta informa Gerencia cu ta un reunion pa pidi apoyo pa participa na un marcha di protesta. 

LO NO HALA BLOKI

Relaciona cu e CFO nobo, SIWA ta menciona cu ta “hala bloki di hende” sin cu e empleadonan mes ta na altura. A informa repetidamente durante reunionnan cu SIWA, reunionnan general cu empleadonan, pero tambe di departamentonan y pa medio di participacionnan por escrito, cu e nombramento di un CFO nobo ta un decision di accionista Utilities Aruba. 

Ta asina cu entrante october 2016, Gerencia di WEB lo consisti un CFO y un COO, caminda e COO a ser apunta pa ta e CEO tambe. E team di sector managers lo keda intacto y asina tambe tur e departamentonan cu ta resorta bou di cada Manager. Unabes cu e CFO drenta servicio y si situacion ta rekeri algun cambio den linea di responsabilidad, lo cumpli debidamente cu e stipulacion di CAO tocante ‘Overleg’.

SITUACION DI PLANTA

Pa loke ta trata e situacion di e planta, Gerencia di WEB ta considera cu bienestar y seguridad di tur empleado ta algo primordial. Ta enfatisa cu pa algun siman caba Gerencia tin atencion di e situacion den planta cu pa gran parti ta regarda e infrastructura. A traha un lista di tur lo cual mester drecha/cambia. Departamentonan di Operacion y Mantencion hunto a pone ordo di prioridad pa haci e trabounan necesario. Esaki ta tuma lugar pa algun siman caba. Ta hopi lamentabel cu di e forma aki SIWA ta lanta panico cerca coleganan y den comunidad.

PESO RIBA COMUNIDAD

Pa loke ta trata e CAO cu ta bay negocia e aña aki pa empleadonan di WEB, Gerencia y SIWA a firma un protocol den cual entre otro a acorda pa no comenta riba e contenido, ni e progreso di e negociacion. Mirando cu SIWA no ta atene su mes na e protocol, no ta keda Gerencia otro opcion, sino pa aclarea un ke otro, sin bay den detaye. 

SIWA ta menciona cu “no ta spera nada pa cu e CAO cu ta bini”. Segun SIWA,  Gerencia a bini cu excuse cu “cos ta frega”. Akinan mester contradeci e ponencia di SIWA, ya cu Gerencia a bisa na varios ocasion, cu e situacion financiero di WEB ta stabil. Gerencia continuamente a bin ta gradici y elogia empleadonan di WEB via diferente medio interno, tanto verbal como por escrito, pa nan dedicacion y contribucion. ‘Ta danki na e esfuerso comun nos a logra saca e compania di su problemanan financiero y cu e plantanan di produccion ta operando na e manera desea.’, Luis Oduber ta splica. ‘Lo cual si nos a bisa SIWA ta cu nos mester hiba un maneho sano pa asina nos por limita e peso riba comunidad. Realidad ta exigi cu nos compania mester bay cu su tempo y mantene su derecho di existencia. Pa keda competitivo riba mercado ta imporante pa opera eficientemente y esey pa nos tur ta trece cambio cu ne.’ 

Gerencia ta lamenta e suceso di e manifestacion y e expresionnan haci pa presidente di SIWA. Con cu bay bin Gerencia, empleadonan y SIWA lo mester sigui hunto na bienestar di WEB y di nos isla. E compania di awa y energia ta uno vital pa nos isla y esey ta rekeri seriedad y accion responsabel. ‘Di parti di gerencia, nos ta keda cu bon boluntad y semper dispuesto pa dialoga.’, Luis Oduber a finalisa.