METEO: Ola tropical aumentando di forsa y por pasa mas cerca di Aruba

ORANJESTAD - Tur atencion e dianan aki ta riba e situacion di tempo, particularmente un ola tropical cu ta moviendo den nos direccion y cu pa awe tardi lo por bira un depresion tropical. Gobierno y METEO ta monitoria e situacion hopi di cerca y a informa cu te cu awe mainta e sistema aki ta moviendo west. E sistema tropical aki su movecion ta depende di dos factor. 1. Un sistema frontal cu lo sali for di Merca diahuebs/diabierna. 2. Un area di presion halto ubica riba mar atlantico.

AUMENTA DEN FORSA

Te cu awe diamars e indicacion ta cu e sistema tropical lo aumenta den forsa y su centro di circulacion lo por pasa mas o menos 150-200 km noord di Aruba diabierna.

AWACERO FOR DI DIAHUEBS CABA

Ultimo indicacion ta cu e sistema tropical aki por haci e aire mas humedo y instabiel, y aumenta nos chens pa awacero for di diahuebs. Den e periodo di diahuebs pa diadomingo biento por boltia tambe y lama tambe, pues lama por bira bruto hasta banda di hotel areanan, cu normalmente ta protegi.

BISTA EXACTO RIBA EFECTONAN

Door cu e sistema ta debil ainda y mester desaroya y ta basta leu, ta dificil pa duna un bista exacto ainda ariba e efectonan. Sinembargo, cu desaroyo of no por spera rafaga di biento durante di awacero cu por yega forsa modera te fuerte (Beaufort 6 te 7, 22 te 33 nudo). Awacero por causa inundacion temporal den cierto caya of barionan di e isla.

BOLETIN

Ta avisa pueblo pa keda pendiente pa boletinan oficial di tempo di gobierno via e canalnan oficial di gobierno. Servicio Meteorologico di Aruba ta den contacto cu diferente otro servicio meteorologico di e regio, National Hurricane Center na Miami y KNMI. Un proximo aviso tocante e situacion di tempo tropical lo wordo emiti awe entre 6-7 pm. E boletinan di prensa relaciona cu e sistema tropical ta wordo haci den coordinacion cu Minister di Transporte, O.E.Oduber y Minister di Asuntonan General M.Eman.