Posibel reduccion tarifa awa y coriente prome cu fin di aña

ORANJESTAD - Tin posibilidad cu e compania di utilidad WEB, por anuncia - posiblemente prome cu fin di aña - un reduccion den tarifa di awa y coriente. Asina director general di e compania Luis Oduber a participa den un comentario sorpresivo diamars mainta durante un conferencia di prensa. E declaracion a bin den cuadro di reaccion contra e sindicato SIWA siman pasa cu a protesta contra e maneho di e director. Un di e critica tabata cu e situacion financiero ta malo. Oduber a refuta e declaracion aki y a mustra te hasta cu e situacion ta duna te hasta pa posiblemente anuncia un reduccion den tarifa di awa y coriente prome cu fin di aña ainda si ta posibel. 

MOTIVACION PA REDUCCION DI TARIFA

Segun Oduber, pa basta luna caba y durante reunionnan cu empleado a informa nan cu e situacion financiero na WEB ta uno sano, y ta sanea compara cu e 2 añanan anterior. "As we speak nos ta evaluando potencial reduccion di tarifa na comunidad" Oduber a bisa, refiriendo na e reduccion di tarifa di awa y coriente. Despues riba e desicion sorpresivo, prensa a sigui puntra y Oduber a confirma cu e intencion ta pa haci esaki si ta posibel, ainda prome cu fin di aña. E ta mustra cu banconan y financiadornan tin tur cifra di WEB y tur ta di acuerdo cu e situacion ta hopi bon na WEB y como tal no tin motibo pa trece panico den comunidad innecesariamente.