Construccion y renobacion hospital completa pa 55% caba

ORANJESTAD - E construccion y renobacion di nos hospital ta completa pa 55%, y a gasta 99.5 miyon florin caba di e placa destina pa e proyecto. Director di Aruba Investment Bank Frendsel Giel a confirma cu mientras cu cos ta canando bon, e proyecto total lo ta completa pa october 2018. Mientrastanto otro aña ta spera cu e edificio di 6 piso lo keda completa tambe. Y pa loke ta e fayo den construccion di 6 sala di operacion nobo, tambe ta resolvi. Giel a confirma cu e plannan ta finalisa pa esaki y ta kedando cla cu e placa tambe pa e parti ey. 

RETRASO

Giel a confirma cu enberdad den un proyecto di tal embergadura - ela yama esaki e proyecto mas grandi den construccion actualmente-, tin retraso y sigur si tin un grupo grandi envolvi den e proceso di desicion. Pero e ta kere cu nan lo 'haal in' e retraso y keda cla den un tempo rasonabel, refiriendo na e fecha di october 2018. Despues a sigui un rondleiding unda cu por a mira e progreso di e construccion.