Cruz Cora a cuminsa prepara voluntarionan pa posibel mal tempo

ORANJESTAD - Cu bista riba e situacion di tempo cu ta biniendo den nos direccion (ola tropical cu ta poni pa converti den tormenta Matthew), Cruz Cora a tene su anochi informativo pa su propio boluntarionan na nan sede na Dakota. Uzando e crew experencia di p.e. horcan Ivan y otronan, un crew relativamente hoben a haya lectura y practica di con pa prepara nan mes y comunidad den caso di calamidad. "Nos ta papiando di e situacion den e area, pa cuminsa, pero con pa nan prepara pa nan cas ta safe. Nos semper ta sali di e punto di bista cu nos voluntarionan mester zorg prome pa nan famia y nan cas" Indra Anthony, operations manager di Cruz Cora Aruba a splica NoticiaCla.com. Esey ta ensera prepara nan propio shelter. 

RISCA BIDA

Anthony a splica cu hopi hende ta lubida cu e boluntarionan ta risca bida den tempo di desaster y pa e prome 72 ora despues di un desaster, no ta wak nan famia. "Pa nan por haci e trabou pa nos comunidad den trankilidad, cu un piece of mind, nan mester sa cu nan cas y nan famia ta safe" Anthony a sigui bisa. Como tal nan a siña e concepto di 'shelter my own house', cu ta significa 'prepara bo propio refugio'. Ey nan ta tende exactamente tur loke nan mester haci pa ta prepara. "No ta significa si tin un calamidad awo of no. No. Semper mester ta prepara y tin tur cos 'inhouse'. Ta distribuyendo un lista tambe di preparacion pa horcan, cu ta obtenibel na Cruz Cora.