Dirkz: Criminalidad a yega un climax y p'esey ta manifesta

ORANJESTAD - E motibo cu comerciante Hubert Dirkz a uni y tuma e mando di e manifestacion di diahuebs, no ta pasobra e kier critica gobierno of motibo politico. Durante un conferencia di prensa ela mustra su preocupacion cu e situacion di criminalidad y como tal a dicidi di bin dilanti. "Loke mi kier ta pa mi biba mi bida trankil, y den siguridad na Aruba. Pa nos por haci negoshi den un ambiente sigur. No pa gasta sumanan increibel" Dirkz a sigui bisa, mustrando cu e mester a triplifica su presupuesto di negoshinan cu e mag guia, pa seguridad. 

AGENDA POLITICO

E grupo cu ta den e manifestacion a wordo tilda di tin un agenda politico segun e comerciante. "Si tin politico cu kier join nos, di back nos up contra criminalidad, nan ta welcome" Dirkz a bisa. E ta mustra cu tin 'guynan' cu ta play 'tough' den parlamento. "Mi kier wak nan play tought contra gobierno. Pasobra esey bo ta wordo paga p'e" e comerciante a sigui bisa. Ela trece algun punto di statistiek, unda cu e cifranan aparentemente no ta wordo uza corecto. Tambe a toca e parti di e percepcion, of 'gevoel'. "Nos ta sinti cu e cos aki ta yegando un climax. Y ela yeg'e basta tempo caba!" Dirkz a bisa. 

SIN SEGURIDAD NO TIN FELICIDAD

Segun e comerciante, a bin hunto pa bisa gobierno cu si e kier scucha, e ta scucha. "Si e no kier scucha, e ta keda sin scucha. Nos ta bisa, bo prioridadnan ta robes" e comerciante a bisa, dunando algun ehempel di kico e ta significa. "Si no tin seguridad, no tin felicidad. Economia ta sufri, tur cos ta sufri. P'esey nos a bin cu e mensahe, pa please cambia e prioridad cu tin cu cambia riba bo lista" Dirkz a bisa. "Si bo kier ta green 2020, God Bless you. Pero mi no kier tin coriente green anto nan ta matami den mi cas!"