Meteo: Ola tropical por pasa 180 km noord di Aruba

ORANJESTAD - Actualmente Servicio Meteorologico ta siguindo di cerca un area di presion abou ubica mas o menos 1300 km oost di Caribe. Dependiendo con fuerta un hoog ariba Atlantico keda den e siman aki y tambe e dia cu un systema frontal sali for di Merca, esey lo tin influencia ariba e sistema tropical su posicion relaciona cu Aruba. Te cu dialuna e indicacion ta cu e sistema tropical lo aumenta den forsa y su centro di circulacion lo por pasa mas o menos 180 km noord di Aruba den comienso di weekend.

Te ainda ta parce cu e sistema tropical aki por haci e aire mas humedo y instabil, y aumenta nos chens pa awacero diahuebs pa diadomingo. Unda e mihor chens lo keda chens ta keda diabierna y diasabra. Den e periodo di diahuebs pa diadomingo biento por boltia tambe y lama tambe. Dor cu e sistema ta debil ainda y mester desarayo y ta hopi leu, ta dificil pa duna un bista exacto ainda.

Ta avisa pueblo pa keda pendiente pa boletinan oficial di tempo di gobierno via Meteo Aruba. Servicio Meteorologico di Aruba ta den contacto cu diferente otro servicio meteorologico di e regio. Si ta necesario lo keda den contacto tambe cu National Hurricane Center. Un proximo aviso tocante e situacion di tempo tropical lo wordo emiti mayan entre 11:30 am -12 pm. E bolentinan di prensa relaciona cu e sistema tropical ta wordo haci den coordinacion cu Minister di Transporte , O.E.Oduber Ministerio di asuntonan general M.Eman. NOTA: Imagen cortesia National Hurrican Center.