KvK tin problema cu ley di CITGO pa su falta di transparencia

ORANJESTAD - Camara di Comercio tin problema cu e ley conoci popularmente como 'e ley di Citgo' cu lo wordo pasa awe den Parlamento. Principalmente e falta di transparencia, y mas ainda, e falta di tempo pa parlamento por a prepara pa esaki. Esey ta comentario di presidente di KVK Daphne Lejuez na NoticiaCla.com. Tambe nan tin problema cu e hecho cu e documento ta wordo scrutina pa wordo investiga. "Mi ta kere cu si ta un documento publico pa wordo trata den un reunion publico, y mirando e embergadura di e contracto pa henter comunidad, mi ta kere cu e mester ta habri pa comunidad wak kico nan ta bay confronta cu ne" Lejuez a bisa. 

Segun e presidente, e no ta wak kico e problema ta pa e parlamentarionan haya aceso na e documentonan manera cu nan kier. "Muy en specifico, a duna nan un tempo cortico pa por wak esaki. E no ta usual tampoco". Esaki mirando e cantidad di documento cu tin y e consecuencia cu e ley aki tin para pa Aruba. "Camara di Comercio ta sinti cu e por a bay miho" Lejuez ta bisa, refiriendo na e forma con a procede pa trata esaki te cu awor. "Falta di transparencia den e documentonan". E unico cos cu KVK por a revisa ta loke a sali di Raad van Advies, cu ta lamentabel segun e presidente. Riba e pregunta si KVK ta sostene e ley manera cu e ta, Lejuez a mustra cu e deal tin hopi pregunta ariba ainda y tin hopi pregunta riba e garantia cu ta cay pa pais Aruba. "E detaye di e contract y kico esaki kiermen pa Aruba" Lejuez a sigui bisa. E ta bisa esaki mirando cu den pasado tabatin varios proyecto cu Aruba a para garantia p'e, pero cu nos no a sali mucho bentahoso for di nan.