Venezuela wardando riba resultado di test di posibel caso di virus Ebola

CARACAS – Muestranan di e test haci riba un yiu di un diplomatico Nigeriano na Caracas a wordo manda pa Atlanta,  Merca pa confirma posibel infeccion cu e virus mortal Ebola. Esaki segun e corant venezolano El Tiempo. Despues cu NoticiaCla a raporta cu tabatin e posibilidad cu un persona lo a wordo contamina, e testnan necesario a wordo haci y ta wardando e resultado awor di esaki. Mietnrastanto testnan inicial ta confirma cu e persona a keda diagnostica positivo pa malaria, pero ta pendiente confirmacion tambe pa Ebola. Motibo cu a manda e testnan pa e estado di Georgia, ta pasobra eynan tin e centro di control pa malesanan contagioso mas grandi di Merca, conoci como CDC.

E menor di edad tabatin keintura for di 36 ora, momento cu e la wordo atendi pa un clinica priva. E la bolbe e hotel unda cu e tabata hospeda, pero no prome cu e hotel a pasa den un operacion grandi sanitario cu a involucra agentenan di seguridad tambe cu a haya e alerta inicial. E hotel mes ta desmenti cu nan tabata den un cuarantena. “A impedi entrada na hende durante oranan di atardi, pues e operatio a tuma tempo pasobra mester a warda pa e cuerpo diplomatico Nigeriano ta presente tambe” un trahado di e hotel a bisa e corant venezolano, El Tiempo.

Tabata diasabra cu NoticiaCla.com a raporta cu Venezuela lo por a conoce su posibel prome caso di e virus Ebola diabierna. Noticianan di Venezuela tabata raporta cu diabierna un huesped procedente di Nigeria, a keda aisla den e hotel Savoy na Sabana Grande, y poni den carentena. Un trahado di e hotel lo a confirma e noticia y informa cu funcionarionan di CICPC (instancia pa investigacion cientifico criminal) lo a bishita e hotel diabierna pa asesora nan mes di e situacion. E persona ta riba piso 4 di e hotel. Di otro banda, autoridad venezolano no kier confirma e asunto aki, y un periodista a desmenti e noticia completo.