Caribbean Sea Jazz tabatin un 'helelé' pa tur hende!

ORANJESTAD - E di dos anochi di e di 10 edicion di Caribbean Sea Jazz Festival tabatin varios momento 'helelé', uzando palabra di un di e artistanan cu a sobresali e anochi ey, Izaline Calister. Tabata obvio cu e interes grandi pa diasabra tabata pa e artista di Corsou, residencia na Hulanda. Hunto cu Calister sinembargo, tabatin grandinan manera Serghio Jansen, Randal Corsen y Levie Silvanie cu a hala publico grandi tambe. Pa no lubida e tributo na Michael Jackson manera presenta pa Tony Succar y Unity, cu presentacion special di Jon Secada. Y pa duna tur un ñapa, a presenta e banda Jemm cu su tributo na Prince, finalisa cu e presentacion di e DJ legendario Ben Liebrand cu a cera e anochi. Otronan cu tambe a presenta tabata Frankie Yanga, Cesar Lopez y su Habana Ensemble y Carlos Bislip cu su Caribbean Combo. 

IZALINE CALISTER

Si e prome anochi a pertenece na Kool & the Gang y Tony Succar, e di dos anochi tabata pa Izaline Calister y Levi Silvanie, acompaña pa Serghio Jansen y Randal Corsen. Izaline Calister mesora a adapta su mes na e publico internacional, presentando su mes den un ingles perfecto, completo cu anecdota. For di e prome tononan, te na e climax cu 'Wow'i Kariño", ela sa di sigura algo pa tur hende. Te hasta invitando cantante Jersey Sophia (Reina di Pordon) y integrantenan di Grupo di Betico (Bendicion). Un presentacion manera cu tur hende a spera, cu su simplicidad y humildad. 

RANDAL, SERGHIO Y LEVI

Un sala yen yen tabata loke cu Randal Corsen a logra presenta cu ne, hunto cu grandinan manera Serghio Jansen y Levi Silvanie. Otro humilde di nos region, Silvanie a sa di gara tur hende cu su ritmo diferente, te hasta honrando grandinan manera Bob Marley y Nat King Cole y presentando nan exito den su estilo perfecto. Corsen, cu tabatin e banda den su man, no tabatin dificultad pa presenta un diversidad di talento y laga nan cada uno luci manera cu nan merece, incluyendo su mes. rondona pa varios keyboard, Corsen mes a mustra pakico e ta e grandi cu e ta. Esnan presente den e sala Purple, a haya loke nan a pidi, y mas. 

TONY SUCCAR Y JON SECADA

Mesora tur hende a mobilisa pa e acto 'final' riba e PADU stage, unda cu un tributo na Michael Jackson tabata na ordo. Uno tras di otro, e exitonan di e defunto legendario Michael Jackson tabata sali. Dado momento e invitado special Jon Secada, visiblemente mas bieu compara su su presentacionan anterior na Aruba, a mustra cu e tin e talento y voz ainda cu e ta conoci p'e. Esnan presente a sa di disfruta e ambiente di '80 den un bachi latino cu tur hende por a identifica cu ne. Tony Succar a demonstra cu su talento ta grandi, sinigual y cu e mucha homber di Peru tin hopi pa brinda ainda pa e proximo añanan. 

ÑAPA

E banda Jemm a sa di duna esnan cu a pidi p'e, un version mas di e exitoso tributo na Prince, manera originalmente nan a haci algun luna pasa den Casibari Cafe. Pa esnan cu no tabata na e prome presentacion ey, nan a disfruta di e mundo di Prince, via e talentoso musiconan di e banda Jemm. Y pa finalisa, e DJ popular renombra internacional Ben Liebrand a finalisa e anochi cu su musica hibando hende back den tempo. Organisadornan di e festival por mira bek riba un fin di siman exitoso cu un line up impresionante cu a laga tur hende satisfecho!