Segun Fraccion di AVP a clarifica puntonan di conflicto entre Aruba y Hulanda

ORANJESTAD – Pa fraccion di partido mayoritario den parlamento, esta AVP, e loke a wordo comunica ayera riba e impasse entre Aruba y Hulanda ta duna claridad riba hopi di e puntonan cu a bira discucion politico y publico den e ultimo simannan. Como tal e partido a duna su comentario riba algun punto cu pa nan ta importante pa subraya.

Segun e fraccion, a keda confirma, manera fraccion di AVP a reitera bez tras bez, cu finansa publico ta un asunto interno di pais autonomo Aruba. Segun e partido, esaki ta un parti esencial di e lucha pa Status Aparte. Den e acuerdo entre gobiernonan di Aruba y di Reino, esaki a wordo ratifica y fortifica. Pa fraccion di AVP cu a defende e punto di bista constitucional aki continuamente, esaki no por ta otro. Ademas e partido ta mustra cu a keda confirma, cu Parlamento di Aruba ta e unico organo constitucional cu por aproba of cambia e presupuesto di Aruba. E proposicionnan pa adapta e presupuesto 2014 cu por sali di e comision mixto pa evaluacion di e presupuesto, mester wordo aproba door di Parlamento di Aruba. Loke cu e fraccion a sigura ayera un biaha mas, ta cu nan ta sostene e maneho financiero di nan gobierno.

E fraccion berde ta hustifica nan sosten na e gobierno indicando cu e maneho cu e gobierno a hiba den ultimo añanan ta sacando Aruba for di e consecuencianan economico, financiero, laboral y social di e crisis, ta wordo reconoci como e maneho cu ta hibando nos pais na finansa publico sostenibel Tambe e fraccion a confirma nan sosten na e cremento sostenibel y e desaroyonan socio-economico positivo di e maneho cu a hiba den e ultimo cuatro aña, y pa e fraccion esaki a wordo reconoci como esun corecto, mescos cu e "rating" internacional ta mustra cu e vision di gobierno di Mike Eman II ta inspira confiansa den futuro. E fraccion no a duna indicacion si nan ta considera e loke a pasa como un entrega di autonomia, manera e partido opositorio a haci, pero mas bien ta keda den espera di e raportnan preliminar y definitivo cu lo wordo instala pa evalua posibel riesgonan financiero y economico di e presupuesto. Igualmente ta keda den espera di e posibel recomendacionnan pa mehora e presupuesto 2014, cu lo mester wordo trata door di Parlamento di Aruba.

E fraccion a mustra den direccion di e partido opositorio argumentando cu durante di tur e lunanan di e discusion aki, e lidernan di e partido MEP a bisa cu e maneho cu gabinete Mike Eman I y II a hiba ta un deroche di placa y ta desastroso pa nos pais. E partido berde a cuestiona e partido MEP, den e sentido cu e partido heel lo ta sosteniendo Hulanda den nan intencion pa interveni den asuntonan interno di nos pais. Algo cu e fraccion berde ta condena. Nan ta nenga di reconoce e adelanto cu nos pais a haci desde november 2009, manera pueblo si a reconoce. MEP ta haya cu gobierno di Reino tin rason pa interveni den asuntonan interno di nos pais. Fraccion di AVP ta considera partido MEP como mal informa, malintenciona y cu nan acusacionnan tabata completamente robes. Hecho a cu partido AVP ta sostene e proceso cu su gobierno a cana den e ultimo siman y cu contrario na esey, oposicion a haci tur pa daña e posibilidad ey.