Prome anochi Caribbean Sea Jazz tabatin un tiki pa tur!

ORANJESTAD - E prome anochi di e di 10 edicion di Caribbean Sea Jazz Festival tabatin tur ingrediente pa ta un festival di caliber total. E line-up porta ta un di e mihornan cu e festival a yega di awe. Y e publico ta testigo di esaki. Mientras cu tur e artistanan presenta a duna tur cu tin, tabatin algun cu sigur a resalta. E momento di climax sigur tabata e ultimo artistanan Kool & the Gang, cu sigur a duna un señor presentacion cu tur, pero tur su exitonan di antes y awor. Pero tabata e momentonan intimo manera un Andy Narell - un gigante riba steelpan - cu a acepta e yiu di tera Lee Connor riba escenario durante presentacion di Caribbo y dun'e su honor, y Kool & the Gang haciendo mescos cu e organisador Erik Urre Eman tocando su baho cu nan riba escenario, sigur tabata un momento di gozo pa esnan den e sala. Pafo, riba tarima DIVI e grupo lidera pa Franklin Granadillo y su Jazz Orchestra unda cu musiconan manera Johnny Scharbaay y Serghio Jansen sigur a saca cara localmente. Cada uno grandi riba su tereno, a luci hunto den un constelaccion perfecto cu a deleita tur esnan presente. E presentacion di New Cool Collective y Matt Bianco riba escenario PURPLE a hala un grupo grandemente domina pa Hulandes, pero tambe internacional y local.  E Peruano Tony Succar y su Latin Show a laga tur hende den expectativa pa su tributo diasabra na Micheal Jackson. E otronan manera Bonarriba y Croeze tambe a mustra nan forsa, y pa entretenimiento di Live X-Pressions, tabatin algo pa tur hende.