A detene 2 sospechoso den caso homicidio Wayaca

ORANJESTAD -Husticia a anuncia awe marduga cu un rato prome a realisa dos detencion importante den e caso di homicidio na Wayaca di diamars siman pasa den oranan di merdia. Ey a dispara riba dos victima di nacionalidad Chines, di cual a resulta herida y e dama S.S.K.F.F. a fayece na e sitio mes. E sospechosonan deteni awor ta di nacionalidad Hulandes (naci na Boneiro) y un Chines. Fiscal Mayor di Ministerio Publico, Mr. Eric Olthof a expresa su elogio pa e forma con profesional e ekipo forma pa Ministerio Publico y Cuerpo Policial a traha, di dia y anochi, pa por a logra yega na e resultado final aki. E no por sigura cu no lo por tin mas detencion pasobra e investigacion ta continua, pero e por garantisa si cu a investiga e rol di e dos sospechosonan den man di husticia awor hopi profundo. Alto Comisario di Polis, mr. Adolfo “Dolfi” Richardson a enfatisa cu Cuerpo Policial no a sosega ni un dia despues di e caso lamentabel aki, pasobra nan tur ta comprometi pa trece trankilidad bek pa nos pais. “A traha incansablemente pa solucion di e caso aki uzando diferente tecnologia y medionan nobo pa logra resultadonan cu awor ta conoci. E profesionalismo demostra ta prueba cu Polis ta capaz pa investiga casonan grandi y complica”, di acuerdo cu e hefe di Cuerpo Policial Aruba. Pa bon di e investigacion, tanto Polis como Ministerio Publico ta opta pa no suministra mas informacion na e momento aki. A gradici Prensa pa por tabata disponibel pa e anuncio aki den oranan di marduga y a sigura cu asina por suministra mas informacion, lo haci esaki den mas detaye.