Corte : Fiscal a pidi 5 aña pa sospechosonan den Caso Rollade Kip

ORANJESTAD - E caso conoci como e "Caso Rollade Kip" a continua diabierna atardi despues di un retraso di algun ora, pa duna un abogado chens pa yega Aruba for di Corsou. Hues a interoga e sospechosonan R.H, J. de S, y R.G. Fiscal a presenta e acusacionnan, y e castigo cu el a exigi contra nan. El a exigi 5 aña menos e tempo cu e sospechosonan aki a pasa den detencion preventivo. Falta ainda pa e abogadonan hiba defensa di nan clientenan y pa fiscal contesta nan y nan conteste'le. E caso lo sigui diamars awor pa 9'or. Ta trata di un caso berdaderamente enorme di labamento di placa. Tur tres sospechoso ta wordo acusa di labamento di placa. H. ta wordo acusa alabes di a intencionalmente keda sin haci aangifte di importacion. E caso a cuminsa lora na december 2014, ora RST a pone e sospechosonan H. y G. bou tap riba peticion di autoridadnan Mericano. Merca tabata hibando un investigacion di labamento di placa. E sospecho tabata cu tabatin un trayecto di labamento di placa completamente nobo, cu tabata core di Roermond, Hulanda, pa Aruba. Autoridadnan na Aruba tambe a cuminsa investiga, y paralelo na esaki, Hulanda a start un investigacion. E investigacion na Aruba a haya e nomber di Tunis. Esun na Hulanda yama 26 Fluor. For di e taps, a sali cu tabatin un container na caminda pa Aruba y berdad riba 22 di juni 2015, autoridadnan na Aruba a intercepta e container aki cu mas di 2,8 miyon Euro scondi den 30 caha di kiprollade. A detene e sospechosonan H. y G. (plus e sospechoso di Husticia Hulandes, Van R.) na Aruba. E sospechoso De S. tabata na Venezuela y a wordo deteni cu ayudo di interpol. Ela pasa 9 luna den detencion preventivo na Venezuela prome cu el a wordo entrega na Aruba. E sospechoso Van R. a wordo traslada pa Hulanda. E container cu a yega Aruba dia 22 no tabata e unico. Investigacion a mustra cu den e periodo di 11 di december 2013 te juni 2015, un total di 10 container a wordo geship di Roermond pa Aruba, di cual 8 tabata cu kiprollade. A base di e comision ey e sospechosonan a cobra (H. y Van R. tabata cobra 4% cada uno y G. y De S. 4% hunto) y mas elementonan den e investigacion, fiscal a yega na e sospecho cu e total di placa cu lo mester a wordo geship den e 8 containernan pa Aruba mester tabata mas di 44 miyon Euro. For di informacion di CID a sali cu e sospechoso De S. kende ta biba na Venezuela, lo tabata mantene contactonan cu un organisacion criminal na Venezuela. E investigacion ta menciona los Chichi y fiscal ta kere cu ta trata di e rumannan Venezolano Emilio M.S. y William M.C, di cual e ultimo ta conoci como Chichi. Nan ta wordo sospecha di ta meti den traficacion di droga y arma.

Banda di e castigo di prizon, fiscal a presenta e asina yama ontnemingsvordering contra e sospechosonan. Esaki kiermen basicamente cu ta kita tur ganashi cu nan tabatin cu nan "negoshi" (den boca di pueblo: ta pluma nan). E parti di ontneming di H. ta di ongeveer 1,5 miyon Florin. E parti di ontneming pa e sospechoso G. ta di 670.000 florin. Pa loke ta e  placa cu a wordo haya den su cas scondi bou plafond (280.000 Euro), fiscal a pidi pa e wordo verbeurd verklaard. E parti di ontneming di De S. ta di 1,4 miyon Florin.

E placa cu a wordo haya den e container (2,8 miyon Euro) y cu a wordo tuma den beslag na juni 2015, fiscal a pidi pa e tambe wordo verbeurd verklaard. Desde cu e placa a wordo tuma den beslag, ningun hende a bin claim esaki pues. Fiscal a pidi pa e sospechosonan aki bay back KIA, pero hues a bisa cu tocante esey e lo dicidi diamars, despues cu e scucha e abogadonan. E caso ta sigui diamars awor.