Polis cu alerta pa tipo di atraco nobo sosodiendo na Aruba

ORANJESTAD - Cuerpo Policial Aruba a emiti un alerta na tur cuidadano pa tene cuidou cu trendnan nobo di criminalidad y pa no confia hende straño, no acepta ofertanan dudoso y evita areanan cuestionabel. Pa ilustra nan punto, a relata algun suceso di e ultimo 24 ora cu ta conduci na e pensamento ey. 

PROME CASO DI ATRACO 'NOBO'

Awe, diabierna 23 di september 2016, pa mas o menos 05:45 ora, Central di polis ta wordo notifica cu tin un homber completamente sunu ta yega KIA sin paña y pidi asistencia di polis. Na yegada di patrouille ta bin constata cu e homber aki a wordo atraca (segun su declaracion) pa dos hende muher y algun otro persona desconoci. Segun e version di e victima ela topa e dos hende muhernan aki den hanchinan na San Nicolas y a ser invita pa bay "di fiesta" cu nan den cercania di Zwart Mangel. Eynan lo tabatin hende ta spera nan y nan a atraca e victima y lag'e completamente sunu atras den e area. E no a wak un arma den scuridad, pero a sinti algo duro na su cabes y a asumi cu ta un arma. Nan no a logra bay cu su auto si. E caso ey ta bou investigacion.

OTRO CASO DI ATRACO

Casi simultaneamente ta wordo gemeld un otro caso den area di Roger's Beach unda cu nan lo a haya un curpa sin bida. Na yegada nan ta topa un otro hende homber casi sunu cu ta bisa na prome instante cu dos hende muher lo a atraca su persona. Cu e muhernan a invit'e pa bay bebe y gosa un rato banda di beach y ela hay'e ta bin bij na e sitio, sin paña, sin placa y tambe sin su auto. Despues ela cambia su declaracion  y bisa cu e tabata den compania di un hende muher cu e conoce y cu e muher ey a bandona e sitio cu su auto, sin su permiso.  Un rato despues, na haltura di Cura Cabay un patrouille di San Nicolas a senjala e auto en cuestion, a logra par'e y a duna e auto bek na su doño.  E victima a wordo splica kico su derechonan ta pa entrega keho si e ta desea esaki. E prome caso ta bou di investigacion ainda y mester bay verifica tur detayes.

ALERTA DI POLIS

P'esey Cuerpo Policial Aruba kier emiti un alerta na tur cuidadano pa tene cuidou cu trendnan nobo di criminalidad y pa no confia hende straño, no acepta ofertanan dudoso y evita areanan cuestionabel. Polis ta finalisa nan mensahe cu 'Corda cu preveni ta mihor cu lamenta'.