IOWUA ta inicia reunionnan awe pa regla nan asuntonan laboral

ORANJESTAD - Awe ta inicia e prome di un serie di reunion, cu e meta final pa logra trece trankilidad entre e 52 trahadonan di Valero cu a keda bou di e representacion di nan sindicato IOWUA. Su presidente Boy Anthony a confirma na NoticiaCla.com cu nan a haya reaccion di e.o. San Antonio (Valero y CITGO) pa sinta na mesa mientras cu awe e tin e prome reunion cu un comision di Parlamento. Y lo sigui e proximo dianan cu reunion cu e.o. representantenan di Valero y CITGO. Despues di esey, lo reuni atrobe cu e trahadonan y wak si nan ta acepta e loke a keda presenta na nan. Mientrastanto diasabra nan ta ricibi nan ultimo salario di Valero. Con e proximo salario ta bin, ta keda un pregunta ainda cu Anthony kier un contesta ariba, prome cu e refineria cuminsa drey como CITGO. 

META DI REUNIONAN

Segun Anthony, e idea ta pa discuti cu tur partido, e 4 puntonan cu nan ta bringando p'e, y wak con ta regla esaki. "Nos tin cu haci tur cos di nobo. Ora cu e reunionan ey caba y mi meet cu mi miembronan, e ora por bisa kico tur a logra".Anthony ta reconoce cu solucion normalmente ta na mesa. "Pero un accion, un paro ta ora cu bo no tin alternativa. Ora cu bo haci tur lo posibel pa un solucion na mesa, y cu e no logra, bo ta yama un reunion general pa bin cu un paro, loque bo no kier" Anthony a bisa, argumentando cu tur partido ta perde. Esey no ta kita afo cu esey ta un di e posibilidadnan aworaki, mirando con e trahadonan ta sinti. Nan ta sinti cu a pasa nan un fast ball cu e proceso di negociacion manera cu ela bay. "Mi tin e trahadonan basta bon calma, pero nan ta bisa'mi 'Boy yama e reunion general'. Tanten cu mi ta na mesa, tin speransa pa solucion. Pero momento cu mi yama e reunion general, anto e ora nos ta hopi leu ta bay" Anthony a sigui bisa. Den mesun rosea Anthony a splica cu cos a hera bay foi man caba, indicando cu e trahadonan kier a bay den accion caba. Pero e reunion cu a wordo yama, a suavisa e situacion. 

VALERO TA BIN ARUBA BEK PA REUNI

Valero mientrastanto a confirma na IOWUA cu nan lo bin Aruba bek pa reuni cu nan y wak con por regla e asuntonan cu falta. Mescos e caso ta cu CITGO, y tambe nan abogado. E reunionnan ey ta programa pa continua e proximo dianan. En todo caso, e intencion ta pa resolve tur problema laboral pendiente prome cu Parlamento aproba e ley y cu CITGO cuminsa opera e refineria 1 october.